मंत्री चंद्रकांत पाटील यांच्याकडून मुंबई उच्च शिक्षण सहसंचालक कार्यालयाची झाडाझडती

एज्युवार्ता न्यूज नेटवर्क 

राज्याचे उच्च व तंत्र शिक्षण मंत्री चंद्रकांत पाटील (Higher Education Minister Chandrakant Patil)यांनी मंगळवारी अचानक मुंबई उच्च शिक्षण सहसंचालक कार्यालयाला (Office of Joint Director of Higher Education Mumbai)भेट देवून कार्यालयातील अधिकारी व कर्मचाऱ्यांची झाडाझडती घेतली.कार्यालयातील कामकाज कसे चालते, आलेली फाईल किती दिवसात निकाली काढली जाते, त्यासाठी ट्रॅकिंग सिस्टिम तयार करण्यात आली आहे किंवा नाही, या व आशा अनेक विषयांची बारकाईने चौकशी करून कामात अधिक गतीमानता आणि पादर्शकता आणण्याच्या दृष्टीने उपाययोजना सुचवल्या.तसेच लवकरच राज्यातील दुसऱ्या एका कार्यालयाला अचानक भेट देणार असल्याचे सुतोवाचही मंत्री चंद्रकांत पाटील यांनी केले.

राज्यातील प्राध्यापक, प्राचार्य, शिक्षकेतर कर्मचारी आणि सेवानिवृत्त कर्मचारी आणि तासिका तत्त्वावर काम करणारे प्राध्यापक अर्थात सीएचबी धारक यांचे सर्व प्रलंबित प्रश्न एका महिन्याच्या आत निकाली काढा, असे स्पष्ट निर्देश राज्याचे उच्च व तंत्र शिक्षण मंत्री चंद्रकांत पाटील यांनी उच्च शिक्षण संचालक कार्यालयाला दिले होते. तसेच स्वत: फेब्रुवारी महिन्यात सर्व उच्च शिक्षण सहसंचालक कार्यालयात प्रत्यक्ष भेट देऊन कार्यालयाची झाडाझडती घेणार असल्याचेही त्यांनी स्पष्ट केले होते.त्यानुसार मंगळवारी उच्च व तंत्र शिक्षणमंत्री चंद्रकांत पाटील यांनी मुंबई उच्च शिक्षण सहसंचालक कार्यालयाला अचानक भेट दिली. यावेळी राज्याचे उच्च शिक्षण संचालक डॉ. शैलेंद्र देवळाणकर,डॉ. प्रकाश बच्छाव आदी उपस्थित होते.

निवृत्तीवेतन,कॅस,सीएचबी बील, मेडिकल बील अशी कोणतीही कामे प्रलंबित दिसल्यास संबंधिताना कारवाईस सामोरे जावे लागेल,असे स्पष्ट संकेत मंत्री चंद्रकांत पाटील यांनी दिले होते.त्यानुसार मंगळवारी या संदर्भातील सर्व कामकाजाचा पाटील यांनी आढावा घेतला.तसेच प्रत्येक फाईल कार्यालयात दाखल झाल्यानंतर त्या फाईलवर इनावर्ड क्रमांक टाकावा. संबंधित फाईल डिजिटल स्वरूपात संगणकात सामावून घेऊन कोणत्या टेबलवर ती फाईल आहे, याबाबतचे ट्रॅकिंग ठेवावे. झीरो पेंडन्सीच्या दृष्टीने काम करावे, अशा सूचना मंत्री पाटील यांनी संबंधितांना दिला असल्याचे सूत्रांनी सांगितले.