विद्यार्थ्यांच्या प्रगतीसाठी प्रयत्न करणाऱ्या जिल्हा परिषदेच्या शिक्षकाला फेलोशिप!

एज्युवार्ता न्यूज नेटवर्क

सातारा येथील माण तालुक्यातील जिल्हा परिषद शाळेतील प्राथमिक शिक्षक बालाजी जाधव (Balaji Jadhav, a primary teacher at the Zilla Parishad School in Maan taluka of Satara) यांची एका दुर्गम आणि ग्रामीण शाळेत केलेल्या नाविन्यपूर्ण प्रयोगांसाठी 'उमंग' या शैक्षणिक फेलोशिपसाठी (Umang' Academic Fellowship) निवड झाली आहे.

मुंबईतील टाटा इन्स्टिट्यूट ऑफ सोशल सायन्सेसने (TISS) देशभरातील ५० प्रयोगशील शिक्षकांची या फेलोशिपसाठी निवड केली आहे. ज्यांना फ्लॉरिशिंग माइंड्स फंड अमेरिकेचे आर्थिक पाठबळ आहे. विशेष म्हणजे जाधव हे महाराष्ट्रातील एकमेव शिक्षक (The only teacher in Maharashtra) आहेत. नोव्हेंबर २०२४ मध्ये अर्ज सादर करण्यात आले होते आणि प्रकल्प सादरीकरण आणि मुलाखत अशा तीन-टप्प्यांमधील प्रक्रियेद्वारे अंतिम ५० शिक्षकांची निवड करण्यात आली होती.

ग्रामीण भागातील या शाळेत जाधव यांनी धनुर्विद्या, साबण तयार करणे, घड्याळे तयार करणे, परदेशी भाषा शिक्षण, मोडी लिपी शिक्षण, उत्कृष्ट वारली चित्रे तयार करणे, स्वतःच्या कथा लिहणे, शिक्षणात टॅब आणि स्मार्ट बोर्डचा उपयोग असे नावीन्यपूर्ण प्रयोग करत शाळेतील विद्यार्थ्यांची पटसंख्या वाढवली आहे. याशिवाय नवोपक्रमामुळे म्हसवड आणि आसपासच्या गावांमधील सुशिक्षित कुटुंबातील विद्यार्थी देखील जाधव यांच्या शाळेत शिक्षण घेतात. तसेच या उपक्रमांमुळे मोठ्या प्रमाणात सीएसआर निधी उभारण्यास मदत झाली आहे असे शिक्षक जाधव सांगतात.

दरम्यान, आजपर्यंत अनेक पुरस्कार प्राप्त झाले असले तरी या फेलोशिपद्वारे स्वतःला समृद्ध होण्याची, देशभरातील ५० प्रयोगशील शिक्षकांबरोबर काम करण्याची संधी मिळेल त्याचबरोबर फेलोशिपद्वारे मिळणाऱ्या शिक्षणाचा फायदा जिल्हा परिषद शाळेतील मुलांना देता येणार आहे, ही बाब अधिक आनंदाची आहे, अशी भावना शिक्षक बालाजी जाधव यांनी व्यक्त केली.