शाळा गुणवत्ता मुल्यांकन, आश्वासन आराखडा भरण्यास मुदतवाढ 

एज्युवार्ता न्यूज नेटवर्क 

राज्यातील सर्व माध्यमाच्या व सर्व व्यवस्थापनाच्या शाळांचे स्वयं-मूल्यांकन करण्यासाठी शाळा गुणवत्ता मुल्यांकन व आश्वासन आराखडा (School Quality Assessment and Assurance Plan) भरण्यास ३१ मार्चपर्यंत मुदत देण्यात आली होती. मात्र, काही समस्या उद्भवत असल्याने काही शिक्षक संघटनांकडून त्यामध्ये मुदतवाढ करण्याची मागणी करण्यात आली होती. त्यानुसार आता राज्य शैक्षणिक संशोधन व प्रशिक्षण परिषदेकडून (State Council of Educational Research and Training) शाळा गुणवत्ता मुल्यांकन व आश्वासन आराखडा भरण्यासाठी आता १० एप्रिलपर्यंत मुदतवाढ (Extension till April 10) देण्यात आली आहे. 

आजतागायत १००% शाळांची स्वयं-मूल्यांकनाची प्रक्रिया पूर्ण झालेली दिसून येत नाही. त्यामुळे, शाळांचे स्वयं-मूल्यांकन होण्यासाठी १० एप्रिल २०२५ पर्यंत मुदतवाढ देण्यात येत आहे. तरी राज्यातील सर्व व्यवस्थापनाच्या शाळांचे स्वयं-मूल्यांकन करण्यासाठी सहसंचालक, उपसंचालक यांनी आपल्या विभागातील सर्व माध्यमाच्या व सर्व व्यवस्थापनाच्या शाळांचे स्वयं-मूल्यांकन नोंदणी व पूर्तता विहित कालावधीत १००% होईल याची दक्षता घ्यावी, असे पाठवण्यात आलेल्या पत्रात म्हटले आहे. 

राज्यातील सर्व शाळांचे मूल्यांकन करण्यासाठी राज्य शैक्षणिक संशोधन व प्रशिक्षण परिषदेने पुणे येथे राज्य शाळा मानक प्राधिकरण कक्षाची स्थापना करण्यात आली आहे. शाळा गुणवत्ता मूल्यांकन व आश्वासन आराखड्याची (SQAAF) निर्मिती करण्यात आलेली आहे. सर्व माध्यमांच्या व सर्व व्यवस्थापनाच्या शाळांचे स्वयं-मूल्यांकन करण्यासाठी राज्य शैक्षणिक संशोधन व प्रशिक्षण परिषद महाराष्ट्र, पुणे यांच्या maa.ac.in या वेबसाईटवरील SQAAF टॅबवर https://scert-data.web.app/ या नावाने स्वयं-मूल्यांकनासाठीची लिंक उपलब्ध करून देण्यात आली आहे. ही लिंक १० एप्रिल सायंकाळी ५ पर्यंत कार्यान्वित असणार आहे. त्यानंतर ही लिंक बंद करण्यात येणार असल्याची माहिती प्रशिक्षण परिषदेकडून यापुर्वीच देण्यात आली आहे.