परीक्षा परीषदेकडून ४थी व ७वी च्या शिष्यवृती परीक्षेचे प्रवेशपत्र जाहीर

एज्युवार्त न्यूज नेटवर्क 

महाराष्ट्र राज्य परीक्षा परिषद, (Maharashtra State Examination Council) पुणे यांनी इयत्ता चौथी व सातवीच्या शिष्यवृत्ती परीक्षेची प्रवेशपत्रे (Admit Card Release) उपलब्ध करून दिली आहेत.  चौथी व सातवीच्या शिष्यवृत्ती परीक्षेची प्रवेशपत्र शाळेच्या लॉगिनमध्ये उपलब्ध करण्यात आली आहेत. मुख्याध्यापक व शाळा प्रशासनाने puppssmsce.in किंवा 2026-2.puppssmsce.in या अधिकृत संकेतस्थळावर शाळेच्या लॉगिनद्वारे प्रवेशपत्र डाउनलोड करून त्याची प्रिंट काढून तात्काळ सर्व विद्यार्थ्यांना वितरित करावे, असे आवाहन राज्य परीक्षा परिषदेकडून करण्यात आले आहे. शनिवार, दि. २६ एप्रिल रोजी (Exam on April 26) सर्व जिल्ह्यांतील ७ हजार ७९३ परीक्षा केंद्रावर एकाच दिवशी ही परीक्षा  घेण्यात येणार आहे.  

यंदा या परीक्षेसाठी राज्यभरातून तब्बल ११ लाख ५५ हजार ७६७ विद्यार्थ्यांनी नोंदणी केली आहे. प्राथमिक शिष्यवृत्ती परीक्षा (इ.४थी) प्राथमिक स्तरावरील विद्यार्थ्यांसाठी तर उच्च प्राथमिक शिष्यवृत्ती परीक्षा (इ. ७वी) ही सातवीच्या विद्यार्थ्यांसाठी आयोजित करण्यात आली आहे. मराठी, हिंदी, उर्दू, इंग्रजी आदी भाषांमध्ये  परीक्षा  घेतली जाईल. प्रवेशपत्र घेण्यासाठी विद्यार्थ्यांना कोणत्याही प्रकारचे शुल्क भरण्याची आवश्यकता नसल्याचे परिषदेकडून नमूद करण्यात आले आहे. 

विद्यार्थ्यांनी प्रवेशपत्रातील नाव, शाळा, परीक्षा केंद्र यासारखी माहिती काळजीपूर्वक तपासावी. कोणतीही त्रुटी आढळल्यास ताबडतोब परीक्षा परिषदेशी संपर्क साधावा. परीक्षेच्या दिवशी प्रवेशपत्र सोबत आणणे अनिवार्य आहे. अधिक माहितीसाठी महाराष्ट्र राज्य परीक्षा परिषदेच्या अधिकृत वेबसाइट www.mscepune.in वर भेट द्यावी. शाळा प्रशासनाने प्रवेशपत्र वेळेतडाउनलोड करून विद्यार्थ्यांना वितरित करावे, असे आवाहन परीक्षा परिषदेकडून करण्यात आले आहे.

परीक्षा परिषदेने दिलेल्या आकडेवारीनुसार यंदा चौथीच्या परीक्षेसाठी ६ लाख ९४ हजार ४७, सातवीच्या शिष्यवृत्ती परीक्षेसाठी ४ लाख ६१ हजार ७२० अशा एकूण ११ लाख ५५ हजार ७६७विद्यार्थ्यांनी नोंदणी केली आहे. चौथीची परीक्षा ४ हजार ५६३, तर सातवीची परीक्षा ३ हजार २३० परीक्षा केंद्रांवर आयोजित केली जाणार आहे.