राज्यातील १२ हजार ७८० प्राध्यापकांची दिवाळी होणार गोड; ७४ कोटी १५ लाख रक्कम कोषागारात जमा

एज्युवार्ता न्यूज नेटवर्क 

राज्यातील सीएचबी धारक प्राध्यापकांच्या मानधानाचा प्रश्न मार्गी लावण्याचे आदेश पुन्हा एकदा उच्च शिक्षण संचालक कार्यालयाने सर्व सहसंचालक व संलग्न महाविद्यालयांच्या प्राचार्यांना दिले होते.मात्र, नागपूर, कोल्हापूर विभागातील काही सीएचबी प्राध्यापकांचे प्रश्न सुटले नाहीत,असे महाराष्ट्र नव प्राध्यापक संघटनेतर्फे सांगितले जात होते. त्यातच नवीन शैक्षणिक धोरणानुसार भारतीय ज्ञान परंपरा या अंतर्गत विद्यार्थ्यांना नवनवीन विषय शिकवले जात आहेत. परंतु, या विषयांचे मानधन दिले जाणार नसल्याचे सहसंचालक कार्यालयाकडून सांगितले जात आहे,असेही महाराष्ट्र नव प्राध्यापक संघटनेचे अध्यक्ष डॉ. संदीप पाथ्रीकर सांगत आहेत.मात्र शासकीय अनुदानित महाविद्यालयातील १२ हजार ७८० तासिका तत्वावरील अध्यापकांचे (सीएचबी) सुमारे ७४ कोटी १५ लाख रुपये मानधन अदायगीची देयेके सबंधित कोषागार कार्यालयात सादर करण्यात आली आहेत.त्यामुळे सीएचबी प्राध्यापकांची दिवाळी गोड होईल,असे उच्च शिक्षण विभागाकडून कळविण्यात आले आहे. 

उच्च शिक्षण संचालनालयाच्या आधिपत्याखालील राज्यातील अशासकीय अनुदानित महाविद्यालयातील सीएचबी अध्यापकांना त्यांचे मानधन वेळेत मिळावे. यासाठी गेल्या तीन ते चार आठवड्यापासून उच्च शिक्षण संचालनालय स्तरावरून सर्व अकृषी विद्यापीठांच्या कुलसचिवांना या अध्यापाकांच्या नियुक्तीस विहित वेळेत मान्यता बहाल करणे, तसेच सर्व विभागीय सहसंचालकांनी सबंधित महाविद्यालयांकडून सीएचबी अध्यापकांची वेतन देयके मागवून घेणे, कोषागार कार्यालयास  वेळेत देयके सादर करणे इ. कार्यवाहीस गती देण्यासंदर्भात वेळोवेळी ऑनलाईन/ऑफलाईन बैठका घेण्यात आल्यात.  या प्रयत्नांमुळे राज्यातील अशासकीय अनुदानित महाविद्यालयातील १२७ हजार ८० तासिका तत्वावरील अध्यापकांचे (सीएचबी) जवळजवळ रु. ७४कोटी १५ लाख रुपयांची  मानधन अदायगीची देयेके सबंधित कोषागार कार्यालयात सादर करण्यात आली  आहेत. त्यामुळे राज्यातील सर्व सीएचबी अध्यापकांचे मानधन दिवाळी पूर्वी सबंधित अध्यापकांच्या खात्यात जमा होणार आहे.

सीएचबी धारक प्राध्यापकांना नेहमीच आपल्या हक्काच्या मानधानांपासून वंचित राहावे लागत असल्याचे आढळून आले आहे. सप्टेंबर महिना उजाडला तरी अनेक विद्यापीठांनी सीएचबी प्राध्यापकांना मान्यताच दिल्या नव्हत्या.त्यामुळे या प्राध्यापकांना मानधानांपासून वंचित राहावे लागले होते. त्यावर शिक्षण विभागाने सर्व विद्यापीठांना लेखी आदेश देऊन तात्काळ मान्यता देणे व मानधन वेळेत अदा करण्याचे आदेश दिले होते. तरीही काही प्राध्यापक वेतनाच्या प्रतीक्षेत होते.मात्र, दिवाळी पूर्वी सर्वांना मानधन मिळेल,याची तजवीज केली असल्याचे शिक्षण विभागाकडून कळविण्यात आले आहे.

-------------------------------------------

"गेल्या तीन ते चार आठवड्यापासून उच्च शिक्षण संचालनालय स्तरावरून सर्व अकृषी विद्यापीठांच्या कुलसचिवांना या अध्यापाकांच्या नियुक्तीस विहित वेळेत मान्यता बहाल करणे, तसेच सर्व विभागीय सहसंचालकांनी सबंधित महाविद्यालयांकडून सीएचबी अध्यापकांची वेतन देयके मागवून घेणे, कोषागार कार्यालयास  वेळेत देयके सादर करणे इ. कार्यवाहीस गती देण्यासंदर्भात वेळोवेळी ऑनलाईन/ऑफलाईन बैठका घेण्यात आल्यात. त्याचा हा परिणाम आहे "

-डॉ. शैलेंद्र देवळाणकर, प्र.संचालक, उच्च शिक्षण, महाराष्ट्र राज्य,