नवनियुक्त शिक्षकांना ऐन दिवाळीच्या सुट्टीत प्रशिक्षण

एज्युवार्ता न्यूज नेटवर्क

राज्य शैक्षणिक संशोधन व प्रशिक्षण परिषदेमार्फत (State Educational Research and Training Council) नवनियुक्त शिक्षकांना सेवा प्रवेशोत्तर प्रेरणा कार्यक्रमांतर्गत प्रशिक्षण दिले जाणार आहे. ऐन दिवाळीच्या सुट्टीमध्ये (7 -day training in Diwali) जिल्हास्तरावर हे सात दिवसीय प्रशिक्षण दिले जाणार असल्याने नवनियुक्त शिक्षकांमध्ये नाराजीचा सूर उमटत आहे. त्यानंतर आता शिक्षक आमदार सुधाकर अडबाले (MLA Sudhakar Adbale) यांनी देखील दिवाळी सुटी तसेच विधानसभा निवडणूक पार पडल्यानंतर प्रशिक्षण वर्गाचे आयोजन करावे, अशी मागणी शिक्षण संचालक यांच्याकडे पत्राद्वारे केली आहे. 

राज्य शासनाने इयत्ता १ली ते ८वी आणि ९ वी ते १२वी साठी नवनियुक्त शिक्षण सेवकांसाठी ७ दिवसांच्या प्रशिक्षणाचे आयोजन केले आहे. त्यानुसार ४ नोव्हेंबर ते १० नोव्हेंबर या कालावधीत आयोजित केले आहे. त्याआधी २६ ऑक्टोबरपासून पहिल्या सत्राची परीक्षा संपल्यानंतर विद्यार्थ्यांसह शिक्षकांना दिवाळीच्या सुट्ट्या सुरू होणार आहेत. मात्र, दिवाळी सुटीच्या काळात आयोजित केलेल्या प्रशिक्षणामुळे अनेकांना कुटुंबापासून दूर राहावे लागण्याची शक्यता आहे.

राज्यात विधानसभा निवडणुकीच्या पार्श्वभूमीवर नवनियुक्त शिक्षण सेवकांचे प्रशिक्षण वर्ग होणार आहेत. दि. १० नोव्हेंबर रोजी शिक्षण सेवक यांची टीईटी परीक्षा आहे. दिवाळीत अनेकांचे कौटुंबिक कार्यक्रम  नियोजित असतात. दिवाळी सुटी हा प्रत्येक शिक्षकांचा अधिकार आहे. त्यामुळे प्रशिक्षण दीपावलीच्या कालावधीत राबवू नये, अशी मागणी नवनियुक्त शिक्षकांसह आमदार सुधाकर अडबाले यांनी केली आहे.