MPSC : महाराष्ट्र गट-क पूर्व परीक्षा 'ऑफलाइन'च होणार, अर्जासाठी ३१ जुलैपर्यंत मुदतवाढ; २५ ऑक्टोबरला परीक्षा 

एज्युवार्ता न्यूज नेटवर्क

महाराष्ट्र लोकसेवा आयोगाने (एमपीएससी) गट-क सेवा संयुक्त पूर्व परीक्षा २०२६ साठी (Group-C Services Combined Preliminary Examination 2026) महत्त्वाचा बदल जाहीर केला आहे. जाहिरातीअंतर्गत २६१९ रिक्त पदांसाठी घेण्यात येणारी पूर्व परीक्षा आता ऑनलाइन (CBT) पद्धतीऐवजी ऑफलाइन पद्धतीने (Offline examinations)  २५ ऑक्टोबर २०२६ रोजी (Exam on October 25, 2026) घेण्यात येणार आहे. उमेदवारांच्या मागणी आणि प्राप्त निवेदनांचा विचार करून हा निर्णय घेण्यात आला असून, परीक्षा अर्जासाठी ३१ जुलैपर्यंत मुदतवाढ (Application deadline extended to July 31) देण्यात आली आहे.शुध्दीपत्रक आयोगाच्या संकेतस्थळावर प्रसिद्ध करण्यात आले आहे. या बदलामुळे उमेदवारांना मोठा दिलासा मिळाला आहे.

मूळ जाहिरातीमध्ये परीक्षा संगणक आधारित ऑनलाइन पद्धतीने घेण्याचे नमूद करण्यात आले होते. मात्र, उमेदवारांकडून सातत्याने होत असलेल्या ऑफलाइन परीक्षेच्या मागणीला प्रतिसाद देत आयोगाने जुलै २०२७ पर्यंत ऑनलाइन पद्धत पुढे ढकलण्याचा निर्णय घेतला. त्यामुळे २०२६ ची पूर्व परीक्षा प्रचलित ऑफलाइन पद्धतीनेच घेण्यात येणार आहे. या परीक्षेद्वारे महाराष्ट्रातील विविध विभागीय आणि जिल्हा स्तरावरील गट-क पदांची भरती प्रक्रिया राबवली जाणार आहे.

परीक्षेच्या नवीन वेळापत्रकानुसार, महाराष्ट्र गट-क संयुक्त पूर्व परीक्षा २५ ऑक्टोबर २०२६ रोजी घेण्यात येईल. तर मुख्य परीक्षा २७ डिसेंबर २०२६ रोजी आयोजित करण्यात आली आहे. यापूर्वी पूर्व परीक्षा २७ सप्टेंबरला होणार होती. आयोगाने उमेदवारांच्या सोयीनुसार तारखांमध्येही बदल केला आहे. राज्यातील ३७ जिल्हा केंद्रांवर ही परीक्षा ऑफलाइन पद्धतीने घेण्यात येणार असल्याचे स्पष्ट करण्यात आले आहे.

अर्ज प्रक्रियेसाठी महत्त्वाची मुदतवाढ देण्यात आली आहे. नवीन उमेदवारांना अर्ज सादर करण्याची अंतिम तारीख ३१ जुलै २०२६ रोजी रात्री ११:५९ पर्यंत वाढवण्यात आली आहे. ऑनलाइन शुल्क भरण्याची मुदत ३ ऑगस्ट २०२६ पर्यंत आहे. चलनाद्वारे शुल्क भरण्याची सुविधा बंद करण्यात आली असून, केवळ डेबिट/क्रेडिट कार्ड, नेट बँकिंग किंवा UPI द्वारे ऑनलाइन शुल्क भरणे अनिवार्य आहे.

जिल्हा केंद्र निवडीबाबतही स्पष्ट निर्देश देण्यात आले आहेत. नवीन अर्ज करणाऱ्यांनी अर्ज भरतानाच केंद्र निवडणे आवश्यक आहे. यापूर्वी अर्ज केलेल्या उमेदवारांना १९ जुलै २०२६ दुपारी २ वाजेपासून ३१ जुलै २०२६ पर्यंत “My Account” मधील Center Selection पर्यायाद्वारे इच्छित जिल्हा केंद्र निवडावे लागेल. केंद्र निवड न केल्यास आयोग पत्रव्यवहार पत्त्यानुसार केंद्र निश्चित करेल. एकदा निवडलेल्या केंद्रात कोणत्याही कारणाने बदल करता येणार नाही. मूळ जाहिरातीतील इतर सर्व अटी व शर्ती कायम राहणार. नसल्याचे आयोगाकडून स्पष्ट करण्यात आले आहे. उमेदवारांनी आयोगाच्या अधिकृत वेबसाइटवरून नियमित अपडेट्स तपासावेत आणि खोट्या माहितीपासून सावध राहाण्याचे आवाहन करण्यात आले आहे.