राज्यात काॅम्प्युटर इंजिनीअरिंगच्या ४,५०० जागा वाढल्या

एज्युवार्ता न्यूज नेटवर्क

राज्यात यंदा आर्टिफिशियल इंटेलिजन्स अभ्यासक्रमाच्या (Artificial Intelligence Courses) जागांमध्ये तब्बल ३४ टक्के वाढ झाली आहे. या अभ्यासक्रमाच्या जागा यंदा १२ हजार ६६० वरून १६ हजार ९९५ झाल्या आहेत. त्यामुळे यंदा काॅम्प्युटर इंजिनीअरिंगच्या (Computer engineering)राज्यात ४ हजार ५०० जागांची वाढ (Increase of 4 Thousand 500 seats) झाली आहे. त्यातून इंजिनीअरिंग कॉलेजांचा कॉम्प्युटर आणि तत्सम अभ्यासक्रम सुरू करण्याकडे अधिकाधिक कल असल्याचे दिसून येत आहे. अभ्यासक्रमाच्या इंजिनीअरिंग जागांमध्ये (Engineering course seats) यंदा मोठी वाढ झाली आहे. गेल्या वर्षीच्या तुलनेत यंदा १८ हजार ८७१ ने वाढ होऊन प्रवेशासाठी एकूण १ लाख ७६ हजार ९५ जागा उपलब्ध होणार आहेत.

गेल्या वर्षी इंजिनीअरिंग अभ्यासक्रमाच्या प्रवेशासाठी १ लाख ५७ हजार २२४ जागा उपलब्ध होत्या. विद्यार्थ्यांचा वाढता कल पाहून महाविद्यालयांनी यंदा सर्वाधिक जागा कॉम्प्युटर शाखेच्या संबंधित अभ्यासक्रमांच्या वाढविल्या आहेत. त्यामध्ये आयटी, आर्टिफिशियल इंटेलिजन्स, कॉम्प्युटर इंजिनीअरिंग आणि संबंधित अभ्यासक्रमांच्या प्रवेशासाठी यंदा एकूण ९१ हजार ५२५ जागा उपलब्ध असतील. गेल्या वर्षी याच अभ्यासक्रमांना ७७ हजार ६२६ जागा होत्या.

मागील काही वर्षांत तंत्रज्ञानात मोठे बदल झाले असून, आर्टिफिशियल इंटेलिजिन्स क्षेत्रात करिअरच्या नवीन संधी निर्माण होत आहेत. त्याच धर्तीवर विद्यार्थ्यांचाही या शाखेकडे कल वाढला आहे. मात्र, असे असले तरी गेल्या काही वर्षांत विद्यार्थ्यांचा कल घटलेल्या मेकॅनिकल, सिव्हिल आणि इलेक्ट्रिकल इंजिनीअरिंग संबंधित जागांमध्येही यंदा वाढ झाल्याचे दिसून येत आहे. त्यातून इंजिनीअरिंगच्या प्रमुख शाखा असलेल्या या अभ्यासक्रमांनाही विद्यार्थी प्रवेश घेतील, अशी संस्था चालकांना आशा आहे.