मोठी भरती! महिला व बाल विकास विभागात ८,६६९ पदे भरली जाणार; आदिती तटकरे यांची माहिती
शासन निर्णयानुसार, विभागातील एकूण पदांचा आढावा घेण्यात आला. त्यापैकी काही पदे रद्द करून १६५ नव्या पदांची वाढ करण्यात आली आहे. त्यानुसार विभागासाठी एकूण ८ हजार ६६९ नियमित पदे मंजूर करण्यात आली आहेत.
eduvarta@gmail.com 
एज्युवार्ता न्यूज नेटवर्क
राज्याच्या महिला व बाल विकास विभागाने (Women and Child Development Department) २३ वर्षांनंतर एक मोठा निर्णय घेतला आहे. या विभागात नियमित व बाह्ययंत्रणेद्वारे एकूण ११ हजार ५१२ पदे व २ लाख २१ हजार ३२८ अंगणवाडी कर्मचाऱ्यांच्या मानधनी पदाच्या सुधारित आकृतीबंधास मंजुरी (Approval of Revised Organizational Structure) देण्यात आली आहे, याबाबतची माहिती राज्याच्या महिला व बालविकास मंत्री आदिती तटकरे (Aditi Tatkare) यांनी दिली आहे. तसेच महिला व बाल विकास विभागात ८ हजार ६६९ नियमित पदे (8,669 Regular Posts) भरण्यात येणार असल्याचे त्यांनी सांगितले.
शासन निर्णयानुसार, विभागातील एकूण पदांचा आढावा घेण्यात आला. त्यापैकी काही पदे रद्द करून १६५ नव्या पदांची वाढ करण्यात आली आहे. त्यानुसार विभागासाठी एकूण ८ हजार ६६९ नियमित पदे मंजूर करण्यात आली आहेत. याशिवाय, विभागाच्या कामकाजासाठी २ हजार ८४३ पदे बाह्ययंत्रणेमार्फत भरण्यास मान्यता देण्यात आली आहे. एकात्मिक बाल विकास सेवा योजनेअंतर्गत १ लाख १० हजार ६६४ अंगणवाडी सेविका व १ लाख १० हजार ६६४ अंगणवाडी मदतनीस, अशी एकूण २ लाख २१ हजार ३२८ मानधनाधारित पदे देखील मंजूर करण्यात आली आहेत. या निर्णयामुळे विभागाच्या सक्षमीकरणाला मोठी चालना मिळणार असल्याची माहिती मंत्री आदिती तटकरे यांनी दिली आहे.
मंत्री अदिती तटकरे यांनी दिलेल्या माहितीनुसार, 23 वर्षांनंतर घेतलेला हा महत्त्वपूर्ण निर्णय विभागाच्या सक्षमीकरणासाठी अत्यंत उपयुक्त ठरणार आहे. यामुळे महिला व बालकल्याण योजनांची अंमलबजावणी अधिक प्रभावीपणे होईल, असे अदिती तटकरे म्हणाल्या.
