दहावी उत्तीर्णांना नोकरीची सुवर्णसंधी, CRPF मध्ये ९,१९५ पदांसाठी आजपासून अर्ज प्रक्रिया सुरू 

एज्युवार्ता न्यूज नेटवर्क

जर तुम्ही दहावी उत्तीर्ण असाल आणि सरकारी नोकरीचे स्वप्न पाहत असाल, तर तुमच्यासाठी ही एक मोठी सुवर्णसंधी चालून आली आहे. केंद्रीय राखीव पोलीस दलाने (सीआरपीएफ) वर्ष २०२६ साठी कॉन्स्टेबल भरतीची (Constable Recruitment) अधिकृत अधिसूचना प्रसिद्ध (Notification released) केली आहे. या भरती प्रक्रियेद्वारे एकूण ९ हजार १९५ पदांसाठी पात्र उमेदवारांची भरती केली जाणार आहे. अर्ज प्रक्रिया आज २० एप्रिल २०२६ पासून सुरू झाली आहे. अर्ज करण्याची अंतिम मुदत १९ मे २०२६ पर्यंत (Deadline 19 May) असणार आहे. 

या भरतीमध्ये विविध ट्रेड आणि तांत्रिक पदांचा समावेश आहे. एकूण ९ हजार १९५ पदे वेगवेगळ्या श्रेणींमध्ये विभागली आहेत. यामध्ये पुरुष उमेदवारांसाठी ९ हजार ९६ पदे, महिला उमेदवारांसाठी ७९ पदे आणि २० पायनियर विंग पदांचा समावेश आहे. या पदांमध्ये ड्रायव्हर, कुक, सुतार, शिंपी, न्हावी, धोबी, सफाई कर्मचारी आणि इतर तांत्रिक पदांसारख्या विविध पदांचा समावेश आहे.

सीआरपीएफ कॉन्स्टेबल भरती प्रक्रियेत सहभागी होण्यासाठी, उमेदवार भारतीय नागरिक असणे आवश्यक आहे. तसेच उमेदवार किमान १० वी (मॅट्रिक) उत्तीर्ण असणे आवश्यक आहे. काही तांत्रिक किंवा व्यवसाय-संबंधित पदांसाठी, आयटीआय प्रमाणपत्र किंवा संबंधित अनुभव देखील आवश्यक असू शकतो. चालक पदासाठी उमेदवारांचे वय २१ ते २७ वर्षांच्या दरम्यान असावे, तर इतर पदांसाठी वयोमर्यादा १८ ते २३ वर्षे आहे. शासकीय नियमांनुसार राखीव प्रवर्गातील उमेदवारांना वयोमर्यादेत सवलत मिळणार असल्याचे सांगण्यात आले आहे. 

असा करा भरतीसाठी अर्ज 

सीआरपीएफ कॉन्स्टेबल भरतीसाठी, उमेदवारांनी सीआरपीएफच्या अधिकृत वेबसाइट rect.crpf.gov.in ला भेट द्यावी. त्यानंतर, कॉन्स्टेबल भरती २०२६ या लिंकवर क्लिक करा. नवीन उमेदवार म्हणून नोंदणी करा आणि अर्ज भरा. नोंदणीनंतर, आवश्यक कागदपत्रे अपलोड करा. तसेच अर्ज शुल्क भरून अर्ज सबमिट करून त्याची प्रिंट काढून घ्या.