दुसरीत शिकणाऱ्या ८ वर्षाच्या विद्यार्थ्याची दोन मित्रांनी गळा दाबून केली हत्या

एज्युवार्ता न्यूज नेटवर्क

जालना जिल्ह्यातून एक धक्कादायक (Jalna Crime News) बातमी समोर आली आहे. शाळेच्या मैदानावर झालेल्या किरकोळ भांडणाचा राग डोक्यात धरून इयत्ता दुसरीत (Second Standard student) शिकणाऱ्या ८ वर्षाच्या विद्यार्थ्याची गळा दाबून हत्या (Student murder) करण्यात आली आहे. तिसरीच्या वर्गात शिकणाऱ्या दोघांनी मिळून हा खून केला आहे. त्यामुळे संपूर्ण जिल्हा हादरून गेला आहे. या प्रकरणी खून केलेल्या विद्यार्थ्यांना पोलिसांनी ताब्यात घेतले आहे.

जालना जिल्ह्यातील भोकरदनमध्ये गणपती इंग्रजी माध्यमाची शाळा आहे. या शाळेत शिकणाऱ्या विद्यार्थ्यांचा खेळाच्या मैदानात वाद झाला. अजय पवार या विद्यार्थ्याचा तिसरीतल्या विद्यार्थ्यां बरोबर वाद झाला होता. वाद झाल्यानंतर हे सर्व विद्यार्थी आदिवासी आश्रम शाळेच्या वसतिगृहात गेले. अजय संध्याकाळचे जेवण करून आपल्या खोलीत झोपला, मात्र सकाळी उठलाच नाही.

सकाळ झाल्यानंतर वसतिगृहातील कर्मचाऱ्यांनी अजयला उठवण्याचा प्रयत्न केला. पण काही उपयोग झाला नाही. त्याचा श्वास बंद झाला होता. त्यामुळे ते कर्मचारी घाबरले. त्यांनी वसतिगृह प्रशासन व पोलिसांना या घटनेची तात्काळ माहिती दिली. घटनेचे गांर्भीय लक्षात घेऊन पोलीस ताबडतोब घटनास्थळी दाखल झाले. अजयला तातडीने शासकीय रुग्णालयात उपचारासाठी दाखल करण्यात आले मात्र तोपर्यंत खुप उशीर झाला होता. डॉक्टरांनी त्याला मृत म्हणून घोषित केले.

कुटुंबियांना अजयच्या गळ्याभोवती दोरीच्या खुणा दिसत दिल्या. त्यामुळे आपल्या मुलाचा खून झाला असावा असा संशय त्याच्या पालकांनी व्यक्त केला. पोलिसांनाही त्यात तथ्य दिसून आले. त्यामुळे त्यांनी याबाबत अधिक तपास केला. चौकशी केल्यानंतर मैदानात वाद झाल्याची बाब पोलिसांना समजली. त्यांनी त्या संबधीत दोन विद्यार्थ्यांकडे चौकशी केली. घाबरलेल्या मुलांना विश्वासात घेतल्यानंतर त्यांनी झालेला सर्व प्रकार सांगितला. अजय रात्री झोपेत असताना आपण त्याचा गळा दाबून खून केल्याची कबूली या दोन्ही विद्यार्थ्यांना पोलिसांना दिली.