मुंबई विद्यापीठ कार्यक्षेत्रात 15 नवीन महाविद्यालये प्रस्तावित

एज्युवार्ता न्यूज नेटवर्क 

 महाराष्ट्र सार्वजनिक विद्यापीठ अधिनियमानुसार विद्यापीठाने तयार केलेल्या बृहत आराखड्यानुसार मुंबई विद्यापीठाच्या (Mumbai University)कार्यक्षेत्रात नवीन  15 महाविद्यालये प्रस्तावित करण्यात आली आहेत. यामध्ये 13 कौशल्याधारीत, 1 उपयोजित आणि 1 पारंपारिक महाविद्यालयांचा समावेश आहे. ही सर्व प्रस्तावित नवीन महाविद्यालये मुंबई विद्यापीठाच्या कार्यक्षेत्रातील मुंबई, ठाणे, रायगड, रत्नागिरी, सिंधुदूर्ग आणि पालघर जिल्ह्यात निश्चित करण्यात आली आहेत.

ही नवीन महाविद्यालये ठाणे जिल्ह्यातील दिवा, अडवली, ढोकळी, भिवंडी पडघा येथे 3 ,रायगड जिल्ह्यातील पेण वडखळ, रोहा नागोठणे, मुरूड रायगड येथे 3  असतील. रत्नागिरी जिल्ह्यातील मंडणगड, दापोली नगरपंचायत क्षेत्र येथे 2, सिंधुदुर्ग जिल्ह्यातील कणकवली, वेंगुर्ला पारूले येथे 2 आणि पालघर जिल्ह्यातील केळवे माहिम, वसई नालासोपारा, विक्रमगड बंधन येथे 3 अशा ठिकाणांसाठी स्थळ बिंदू निश्चिती करण्यात आली आहे. तसेच भिवंडी आणि गावदेवी डोंगरी अंधेरी येथे पूर्वीचे दोन बिंदू ज्यामध्ये 1 पारंपारिक आणि 1 उपयोजित महाविद्यालाचा समावेश आहे.

मुंबई विद्यापीठाच्या सन 2024-25 ते 2028-29 च्या पंचवार्षिक बृहत आराखड्यामधील शैक्षणिक वर्ष 2025-26 साठीचा वार्षिक बृहत आराखडा अधिष्ठाता मंडळाने तयार केला. व्यवस्थापन परिषद आणि विद्या परिषदेच्या बैठकीत याअनुषंगाने ठराव करण्यात आला व शासनाच्या मान्यतेसाठी म्हणून अधिसभेपुढे ठेवण्यात आला होता. नुकत्याच झालेल्या अधिसभेच्या बैठकीत हा वार्षिक बृहत आराखडा सर्वानुमते मंजूर करण्यात आला.