मोठी बातमी: SPPU कमवा व शिका योजनेच्या मानधनात वाढ; तीन जिल्ह्यातील विद्यार्थ्यांना फायदा
विद्यापीठाने प्रत्येक तासासाठी 55 रुपयांवरून 65 रुपयांपर्यंत मानधान वाढ करण्याचा निर्णय घेतला आहे. पुणे, अहिल्यानगर आणि नाशिक या तीन जिल्ह्यातील हजारो विद्यार्थ्यांना या निर्णयाचा फायदा होणार आहे.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठातील विविध विभागामध्ये व संलग्न महाविद्यालयामध्ये शिक्षण घेणाऱ्या आणि कमवा व शिका योजनेअंतर्गत काम करणाऱ्या विद्यार्थ्यांच्या मानधनात वाढ करण्याचा निर्णय विद्यापीठातर्फे घेण्यात आला आहे. त्यामुळे वाढत्या महागाईच्या काळात शिक्षणासाठी पुण्यात आलेल्या अनेक विद्यार्थ्यांना दिलासा मिळणार आहे. विद्यापीठाने प्रत्येक तासासाठी 55 रुपयांवरून 65 रुपयांपर्यंत मानधान वाढ करण्याचा निर्णय घेतला आहे. पुणे, अहिल्यानगर आणि नाशिक या तीन जिल्ह्यातील हजारो विद्यार्थ्यांना या निर्णयाचा फायदा होणार आहे.
विद्यापीठात व विद्यापीठाशी संलग्न महाविद्यालयात शिक्षण घेणाऱ्या विद्यार्थ्यांना स्वतःचा आर्थिक खर्च स्वतःच भागवता यावा, या उद्देशाने कमवा व शिकाय योजना राबविली जाते. या योजनेअंतर्गत विद्यार्थ्यांना शिक्षण संस्थेतच प्रशासकीय व इतर अशैक्षणिक कामे दिली जातात. त्यासाठी विद्यार्थ्यांना 55 रुपये तास एवढे मानधन दिले जाते. परंतु या मानधनात वाढ करावी, अशी मागणी विविध विद्यार्थी संघटनांकडून करण्यात आली होती.
विद्यापीठाच्या अधिसभेच्या दिवशी विद्यार्थ्यांनी मोठ्या संख्येने आंदोलन करून विद्यापीठ प्रशासनाला मानधन वाढ करण्याचे निवेदन दिले होते. त्यावर विद्यापीठातर्फे सकारात्मक निर्णय घेतला जाईल, असे आश्वासन आंदोलनकर्त्या विद्यार्थ्यांना देण्यात आले होते.
मानधन वाढीबाबत विद्यापीठ प्रशासनाने विद्यापीठाचे व्यवस्थापन परिषद सदस्य डॉ.देविदास वायदंडे यांची समिती स्थापन केली होती. या समितीने प्रति तास १० रूपये एवढे मानधन वाढवण्याचा निर्णय घेतला आहे. त्यामुळे एका दिवसात 3 तास काम करणाऱ्या प्रत्येक विद्यार्थ्याला पूर्वी पेक्षा दररोज 30 रुपये अधिकचे मानधन मिळणार आहे.
विद्यार्थ्यांनी एका तासाला प्रत्येकी 80 मानधन वाढ मिळावी,अशी मागणी केली होती. मात्र,विद्यापीठाच्या बजेटमध्ये असलेल्या तरतुदीचा विचार करून 65 रुपयांपर्यंत वाढ करण्याचा निर्णय घेण्यात आला आहे.
------------------------------
सावित्रीबाई फुले पुणे विद्यापीठाच्या अधिसभेच्या दिवशी विद्यार्थ्यांनी कमवा व शिका योजनेच्या मानधनात वाढ करण्याची मागणी केली होती. त्यावर विद्यापीठाने स्थापन केलेल्या समितीने 55 रूपयांवरून 65 रूपये मानधन वाढवण्याचा निर्णय घेतला आहे. विद्यापीठातील विद्यार्थी व संलग्न महाविद्यालयामध्ये शिक्षण घेणाऱ्या विद्यार्थ्यांना या मानधन वाढीचा लाभ मिळणार आहे.
- डॉ. देविदास वायदंडे, अध्यक्ष, कमवा व शिका योजना मानधन वाढ समिती, सावित्रीबाई फुले पुणे विद्यापीठ, पुणे
