सेट परीक्षेचा पेपर फुटल्याची अफवा; विद्यापीठाकडून पोलिसांकडे तक्रार 

एज्युवार्ता न्यूज नेटवर्क

सावित्रीबाई फुले पुणे विद्यापीठातर्फे (Savitribai fule Pune University) घेतल्या जाणाऱ्या सेट परीक्षेचा पेपर (set exam paper) फुटला असल्याची अफवा समाज माध्यमांवर पसरली आहे. मात्र, ही निव्वळ अफवा असून यात कुठलेही तथ्य नाही. त्यामुळे विद्यार्थ्यांनी गोंधळून जाऊ नये.विद्यापीठातर्फे या संदर्भातील अधिकृत प्रकटन लवकरच जाहीर केले जाणार आहे, असे विद्यापीठातील अधिकाऱ्यांनी सांगितले.

पुणे विद्यापीठाच्या सेट विभागातर्फे येत्या 15 जून रोजी 40 वी सेट परीक्षा घेतली जाणार आहे. महाराष्ट्र व गोवा राज्यातील 1 लाख 10 हजार 412 विद्यार्थ्यांनी परीक्षेसाठी नोंदणी केली आहे. विद्यापीठातर्फे 18 शहरांमध्ये 256 महाविद्यालयामधील 469 ब्लॉकमध्ये 32 विषयांची परीक्षा आयोजित केली जाणार आहे. विद्यापीठाने आत्तापर्यंत 39 परीक्षा घेतल्या आहेत. एकाही परीक्षेत गैरप्रकार झाला नसल्याचा विद्यापीठाचा इतिहास आहे. विद्यापीठातर्फे परीक्षेबाबत प्रचंड गोपनीयता पाळली जाते. मात्र, इतिहास विषयाचा सेट परीक्षेचा पेपर फुटला असल्याची अफवा पसरल्याने विद्यार्थ्यांमध्ये संभ्रमाचे वातावरण आहे. मात्र, यात कोणतेही तथ्य नाही असे विद्यापीठातील अधिकारी सांगत आहेत.

सेट पेपर फुटीवर विद्यापीठाचे जाहीर प्रकटन

विद्यापीठातर्फे घेतल्या जाणाऱ्या सेट परीक्षेबाबत विद्यापीठाकडून नेहमीच काळजी घेतली जाते. परीक्षेच्या दिवशीच प्रश्नपत्रिका सर्व संबंधित व्यक्तींच्या समोर निश्चित करून मगच परीक्षेसाठी दिली जाते. त्यामुळे परीक्षेपूर्वी प्रश्नपत्रिका फुटण्याचा कुठलाही प्रश्न उपस्थित होत नाही. मात्र, सोलापूर जिल्ह्यातून प्रश्नपत्रिका फुटल्याचे वृत्तसमोर आल्यामुळे विद्यापीठाने याबाबत गांभीर्याने दखल घेऊन पोलिसांकडे याप्रकरणी गुन्हा दाखल करण्याची प्रक्रिया सुरू केली आहे. विद्यापीठाचे पदाधिकारी सायबर पोलिसांकडे या संदर्भात गुन्हा दाखल करण्यासाठी गेले असल्याचे विश्वसनीय सूत्रांनी सांगितले.

-------- 

सावित्रीबाई फुले पुणे विद्यापीठाकडून घेतली जाणारी सेट परीक्षा 15 जून रोजी होणार आहे. त्याचा पेपर फुटल्याची बातमी सध्या काही यूट्यूब चैनल वरून प्रसिद्ध होत आहे. त्यामुळे विद्यार्थ्यांमध्ये गोंधळाची परिस्थिती निर्माण झाली आहे. सेट विभागाचे समन्वय तसेच विद्यापीठाचे प्र कुलगुरू यांच्याशी फोन द्वारे संपर्क करून यासंबंधी माहिती घेण्याचे काम आम्ही केले आहे. लवकरच विद्यापीठ प्रशासनाने त्या संबंधात एखादे प्रकटन प्रसिद्ध करून सत्य परिस्थिती सगळ्यांना सांगावी अशा स्वरूपाची मागणी आम्ही विद्यापीठ प्रशासनाकडे केली आहे . 

- राहुल ससाणे ( अध्यक्ष - विद्यापीठ विद्यार्थी संघर्ष कृती समिती )