सेट पेपर फुटीवर विद्यापीठाचे जाहीर प्रकटन

एज्युवार्ता न्यूज नेटवर्क 

SET EXAM:  सेट परीक्षेसंदर्भात समाज माध्यमांवर काही बनावट बातम्या व्हिडीओ पसरवले जात आहेत. त्यात काहीही तथ्य नसल्याने अशा बातम्या /व्हिडीओवर विद्यार्थ्यांनी विश्वास ठेऊ नये. त्यास अनुसरून सेट परीक्षा विभागाने(Set Department))खोटी बातमी समाज माध्यमांव्दारे पसरविणाऱ्या व्यक्तीवर पुण्यातील सायबर पोलीस स्टेशन मध्ये ११ जून रोजी रात्री ९.०० वाजता तकार अर्ज दाखल केला आहे,असे जाहीर प्रकटन सावित्रीबाई फुले पुणे विद्यापीठातील (Savitribai Phule Pune University)सेट विभागातर्फे प्रसिद्ध करण्यात आले आहे. 

एका युट्यूब चॅनलवर सेट परीक्षेचा पेपर फुटला असून त्यांची प्रश्नपत्रिका मिळण्यासंदर्भातील एक ऑडिओ क्लिप व्हायरल झाली होती.त्यामुळे विद्यार्थ्यांमध्ये गोंधळाचे वातावरण निर्माण झाले होते.मात्र, केवळ महाराष्ट्रातील नाही तर गोवा राज्यातील विद्यार्थी सुध्दा सेट परीक्षा देतात.सुमारे 1 लाख 10 हजारांहून अधिक विद्यार्थ्यांनी सेट परीक्षेसाठी अर्ज केलेला आहे. त्यामुळे पेपर फुटला किंवा काय याबाबत यावर विद्यापीठाने स्पष्टीकरण जाहीर करणे अपेक्षित होते.त्यानुसार विद्यापीठाने याबाबत जाहीर प्रकटन प्रसिद्ध केले आहे.

सावित्रीबाई फुले पुणे विद्यापीठातील सेट परीक्षा विभाग हा महाराष्ट्र शासनाची नोडल एजन्सी तसेच विद्यापीठ अनुदान आयोगाच्या मार्गदर्शक तत्वानुसार महाराष्ट्र व गोवा राज्यातील विद्यापीठ आणि वरीष्ठ महाविद्यालयात सहायक प्राध्यापक पदाची पात्रता परीक्षा घेण्याकरीता प्राधिकृत विभाग आहे. येत्या १५ जून रोजी ४० व्या सेट परीक्षेचे आयोजन सेट विभागामार्फत महाराष्ट्र व गोवा राज्यातील विद्यार्थ्यांकरीता १८ शहरांमधील विविध महाविद्यालयात करण्यात आले आहे.मात्र समाज माध्यमांवर काही बनावट बातम्या व्हिडीओ पसरवले जात आहेत. त्यात काहीही तथ्य नसल्याने अशा बातम्या /व्हिडीओवर विद्यार्थ्यांनी विश्वास ठेऊ नये,असे विद्यापीठाने प्रसिद्ध केलेल्या प्रकटनात नमूद करण्यात आले आहे.