पशुवैद्यकीय व दुग्ध तंत्रज्ञान महाविद्यालयांमध्ये व्यवस्थापन कोट्यासाठी दुप्पट शुल्क; प्राधिकरणाचा निर्णय
महाराष्ट्रातील विनाअनुदानित खासगी पशुवैद्यकीय आणि दुग्ध तंत्रज्ञान महाविद्यालयांमधील व्यवस्थापन कोट्यातून प्रवेश घेणाऱ्या विद्यार्थ्यांकडून सर्वसाधारण कोट्यासाठी निश्चित केलेल्या शुल्काच्या दुप्पट रक्कम आकारण्यास शुल्क नियामक प्राधिकरणाने परवानगी दिली आहे.
Eduvarta
एज्युवार्ता न्यूज नेटवर्क
महाराष्ट्रातील विनाअनुदानित खासगी पशुवैद्यकीय आणि दुग्ध तंत्रज्ञान महाविद्यालयांमधील व्यवस्थापन कोट्यातून प्रवेश घेणाऱ्या विद्यार्थ्यांकडून सर्वसाधारण कोट्यासाठी निश्चित केलेल्या शुल्काच्या दुप्पट रक्कम आकारण्यास शुल्क नियामक प्राधिकरणाने परवानगी दिली आहे. हा निर्णय शैक्षणिक वर्ष २०२६-२७ पासून बी.व्ही.एस्सी. अँड ए.एच. आणि बी.टेक. (डेअरी टेक्नॉलॉजी) अभ्यासक्रमांसाठी लागू होणार आहे. महाराष्ट्र पशु व मत्स्य विज्ञान विद्यापीठाशी संलग्न कायमस्वरूपी विनाअनुदानित महाविद्यालयांमध्ये हे अभ्यासक्रम सुरू होत असल्याने प्रवेश प्रक्रिया सुरू करण्यापूर्वी शुल्क निश्चितीची गरज निर्माण झाली होती.
खासगी वैद्यकीय, तंत्रशिक्षण आणि कृषी महाविद्यालयांमध्ये व्यवस्थापन कोट्यासाठी सामान्यतः तीनपट शुल्क आकारले जाते. मात्र पशुवैद्यकीय व दुग्ध तंत्रज्ञान महाविद्यालयांमध्ये सर्वसाधारण आणि व्यवस्थापन कोट्याचे प्रमाण ५०:५० निश्चित करण्यात आले आहे. इतर व्यावसायिक अभ्यासक्रमांप्रमाणे तीनपट शुल्क आकारल्यास उत्पन्नाचे गणित वेगळे राहील, म्हणून प्राधिकरणाने दुप्पट शुल्क निश्चित केले. यामुळे या महाविद्यालयांना इतर अभ्यासक्रमांच्या तुलनेत समतुल्य महसूल मिळू शकेल.
पशुसंवर्धन, दुग्धव्यवसाय व मत्स्यव्यवसाय विभागाचे सचिव डॉ. रामास्वामी एन. यांच्या विनंतीनुसार हा निर्णय घेण्यात आला. विद्यापीठाने व्यवस्थापन कोट्यातील शुल्क निश्चित नसल्यामुळे प्रवेशप्रक्रियेत अडचणी येत असल्याचे शासनाच्या निदर्शनास आणून दिले होते. प्राधिकरणाने स्पष्ट केले की, कमाल मर्यादेपर्यंत शुल्क आकारण्याची परवानगी दिली असली तरी संस्थांना तेवढेच शुल्क आकारणे बंधनकारक नाही. त्यापेक्षा कमी शुल्क आकारता येईल.
व्यवस्थापन कोट्यातील प्रवेशासाठी आकारण्यात येणारे शुल्क प्रवेश प्रक्रिया सुरू होण्यापूर्वी महाविद्यालयाच्या संकेतस्थळावर आणि सूचना फलकावर स्पष्टपणे जाहीर करणे अनिवार्य आहे. अतिरिक्त शुल्काची संपूर्ण रक्कम महाविद्यालयाच्या उत्पन्न-खर्च विवरणपत्रात आणि लेखा नोंदींमध्ये योग्य प्रकारे दाखवणे आवश्यक आहे. कमी दाखवल्यास शुल्कनिश्चितीवेळी घोषित उत्पन्नाचाच विचार केला जाईल.
प्राधिकरणाने प्रवेशक्षमता आणि कोट्यानुसार मिळणाऱ्या उत्पन्नाचा विचार करून हा निर्णय घेतला आहे. उदाहरणार्थ, शंभर जागा असलेल्या महाविद्यालयात पन्नास विद्यार्थी सर्वसाधारण तर पन्नास व्यवस्थापन कोट्यातून प्रवेश घेतील. नियमांचे उल्लंघन केल्यास कारवाईची तरतूद करण्यात आली आहे. या निर्णयामुळे २०२६-२७ पासून प्रवेश प्रक्रिया सुलभ होईल आणि पारदर्शकता राखली जाईल.
