ज्योती सावित्री जिल्हा परिषद शाळेची बदनामी केल्याने गटशिक्षण अधिकाऱ्यावर निलंबनाची कारवाई
गोविंद लाखे या अधिकाऱ्याने शाळेला भेट दिल्यानंतर चुकीची माहिती प्रसार माध्यमांना दिली. तसेच जिल्हा परिषदेची यामुळे बदनामी झाली. त्यामुळे जिल्हा प्रशासनाने महाराष्ट्र जिल्हा परिषद सेवा शर्ती नियमांअंतर्गत त्यांच्यावर निलंबनाची कारवाई केली आहे.
eduvarta@gmail.com 
एज्युवार्ता न्यूज नेटवर्क
महाराष्ट्राचे मुख्यमंत्री देवेंद्र फडणवीस यांच्या हस्ते नुकतेच उद्घाटन झालेल्या पुणे जिल्ह्यातील पुरंदर तालुक्यातील खानवडी येथील ज्योती सावित्री जिल्हा परिषद शाळेबाबत चुकीची माहिती प्रसारित केल्याप्रकरणी आणि गैरवर्तन केल्यामुळे विस्तार अधिकारी शिक्षण तथा प्रभारी गटशिक्षण अधिकारी गोविंद हरिभाऊ लाखे यांच्यावर निलंबनाची कारवाई करण्यात आली आहे. जिल्हा परिषदेचे मुख्य कार्यकारी अधिकारी गजानन पाटील यांनी ही कारवाई केली आहे.
गोविंद लाखे या अधिकाऱ्याने शाळेला भेट दिल्यानंतर चुकीची माहिती प्रसार माध्यमांना दिली. तसेच जिल्हा परिषदेची यामुळे बदनामी झाली. त्यामुळे जिल्हा प्रशासनाने महाराष्ट्र जिल्हा परिषद सेवा शर्ती नियमांअंतर्गत त्यांच्यावर निलंबनाची कारवाई केली आहे.
निलंबन कालावधीमध्ये लाखे यांना पंचायत समिती राजगड येथील मुख्यालय गट शिक्षण अधिकारी यांच्या पूर्वपरवानगीशिवाय सोडता येणार नाही,असे आदेशांत नमूद करण्यात आले आहे. त्यामुळे शाळेबाबत चुकीची माहिती देणे गटशिक्षण अधिकाऱ्याला चांगलेच महागात पडले आहे.
ज्योती सावित्री जिल्हा परिषद शाळेला मान्यता नसल्याबाबतची चुकीची माहिती या अधिकाऱ्याने प्रसार माध्यमांना दिली असल्याचे बोलले जात आहे. त्यामुळे जिल्हा परिषदेच्या शाळेची बदनामी झाली असल्याचे जिल्हा परिषदेच्या शिक्षण विभागाचे मत आहे.
