जालिंदरनगर जिल्हा परिषदेची शाळा जगातील टॉप 10 शाळांच्या यादीत; दत्तात्रय वारे गुरूजींची किमया

एज्युवार्ता न्यूज नेटवर्क 

पुणे जिल्ह्यातील वाबळेवाडी (Wablewadi School) येथील शाळेचा कायापायलट करणारे आणि शिक्षण क्षेत्रातील उल्लेखनीय कार्याबद्दल सर्वोच्च समजल्या जाणाऱ्या राष्ट्रपती पुरस्काराचे मानकरी दत्तात्रय वारे गुरूजी (President's Award Recipient Dattatreya Vare Guruji) यांनी आणखी एक अनोखी कामगिरी करून दाखवली आहे. खेड तालुक्यातील जिल्हा परिषद शाळा जालिंदरनगर (Zilla Parishad School Jalindernagar in Khed Taluka)या शाळेने जागतिक पातळीवरील T 4 Education या संस्थेमार्फत घेतल्या जाणाऱ्या “वर्ल्ड बेस्ट स्कूल प्राईज“या (World Best School Prize) आंतरराष्ट्रीय दर्जाच्या स्पर्धेत पहिल्या 10 शाळांमध्ये ( top 10 schools) येण्याचा मान मिळवला आहे. विशेष म्हणजे हे मानांकन मिळवणारी जालिंदरनगर येथील शाळा ही भारतातील एकमेव शाळा (only school in India)आहे.त्यामुळे  लोकसहभागातून शाळेचा विकास कसा करता येतो, यांचा संदेश केवळ भारतातच नाही तर जगभरात वारे गुरूजी यांच्यामुळे पोहचला आहे. 

वारे गुरूजींनी करून दाखवलं; उजाड माळरानावर उभारली आंतरराष्ट्रीय शाळा

दत्तात्रय वारे गुरूजी म्हणाले, जालिंदरनगर येथील शाळेने जागतिक पातळीवरील T 4 Education या संस्थेमार्फत घेतल्या जाणाऱ्या “वर्ल्ड बेस्ट स्कूल प्राईज“ या आंतरराष्ट्रीय दर्जाच्या स्पर्धेमध्ये जाणीवपूर्वक सहभाग घेतला. ' लोकसहभागातून शाळा विकास' या स्पर्धेच्या विभागांमध्ये शाळा सहभागी झाली. त्यात बक्षीस मिळवणे हा शाळेचा हेतू नव्हता, तर जागतिक दर्जाच्या शाळा व जागतिक दर्जाचे शिक्षण सरकारी शाळेत उपलब्ध करून देण्याच्या आवाहनाला प्रतिसाद म्हणून केलेल्या प्रयत्नाचा एक भाग होता. जालिंदरनगरची शाळा सरकारी शाळांच्या स्पर्धेमध्ये खूप चांगल्या पातळीवर काम करत आहे. मात्र, आंतरराष्ट्रीय पातळीवर अथवा खाजगी शाळांच्या पार्श्वभूमीवर आपण नेमके कोठे आहोत? हे यानिमित्ताने पाहता येईल व आंतरराष्ट्रीय शाळांच्या प्रतिनिधींची कम्युनिटी तयार झाल्यानंतर त्यांच्या काही चांगल्या ॲक्टिव्हिटी आम्हाला समजतील व त्याचा उपयोग या शाळेत करता येईल, हा या स्पर्धेमध्ये सहभागी होण्याचा मुख्य हेतू होता. 

या स्पर्धेमध्ये सहभागी झालेल्या जगभरातील लाखो शाळांमध्ये वेगवेगळ्या टप्प्यावर जिल्हा परिषद शाळा जालिंदरनगर या शाळेस यश मिळत गेले. त्यानंतर दोन आठवड्यापूर्वी या संस्थेकडून प्राप्त झालेल्या ई-मेल मधील सूचनेनुसार आपल्या शाळेने वर्ल्ड बेस्ट स्कूल कॉम्पिटिशन मध्ये जागतिक पातळीवरील “सर्वोत्तम दहा” शाळांमध्ये स्थान मिळवले आहे,असल्याचे समजले. मात्र,याबाबतची घोषणा 18 जून रोजी केली जाणार होती. त्यानुसार संस्थेचा मेल नुकताच प्राप्त झाला असून याबाबतची अधिकृत घोषणा करण्यात आली आहे. अशा प्रकारचे यश मिळणारी आपल्या राज्यातीलच नव्हे तर देशातील ही पहिलीच सरकारी शाळा आहे. तसेच यावर्षीच्या लोकसहभागातून शाळा विकास या स्पर्धेच्या विभागामध्ये जिल्हा परिषद जालिंदरनगर शाळा ही भारतातील एकमेव शाळा आहे. या कार्यात शिक्षण विभाग व जिल्हा परिषदेचे सर्व प्रशासकीय अधिकारी, शिक्षण अधिकारी यांचे मोलाचे सहकार्य लाभले.तसेच मुख्याध्यापक संदीप मसुडगे गुरूजी यांच्या मोलाच्या सहकार्याने हे शक्य झाले,असेही वारे गुरूजी यांनी सांगितले. 

____________

बंद पडण्याच्या यादीतील शाळा जगातील 10 टॉप शाळांच्या यादीत 

जालिंदरनगर ही शाळा बंद पडणाऱ्या शाळांच्या यादीतील एक शाळा आहे. केवळ बोटावर मोजता येईल एवढ्या विद्यार्थी संख्येवर आलेली शाळेची जबाबदारी वारे गुरूजी यांच्याकडे सोपवण्यात आली.वाबळेवाडी येथून वारे गुरूजी यांची बदली जालिंदरनगर येथील शाळेत करण्यात आली. ओसाड माळरानावर मोडकळीस आलेल्या तीन खोल्यांमध्ये सुरू असलेल्या शाळेचा अवघ्या काही महिन्यात वारे गुरूजी यांनी केवळ लोकसभागातून चेहरा मोहरा बदलून टाकला.विद्यार्थ्यांना शिक्षणाची गोडी लावून त्यांनी फ्रेंच, जर्मनी यांसह इतरही परकीय भाषा शिकवल्या. येथील विद्यार्थी केवळ 300 पर्यंतचे पाठे सहजपणे म्हणत नाहीत तर 1000 पर्यंतचे पाठे चुटकी सरशी तयार करतात. इस्त्रोने शाळेबरबर शैक्षणिक करार केला असून येथील विद्यार्थी उपग्रह निर्मितीचे धडे गिरवत आहेत.अनेक पालक मुलांच्या शिक्षणासाठी शहराकडे जातात पण जालिंदरनगर येथील शाळेत आपल्या मुलांना शिक्षण मिळावे म्हणून काही पालक शहरातून खेड्याकडे आले आहेत, अशी  कायापायलट झालेली जालिंदरनगरची शाळा सर्वप्रथम 'एज्युवार्ता'ने जगासमोर आणली  होती.वारे गुरूजी यांची मुलाखत वर्षभरापूर्वी 'एज्युवार्ता'ने प्रसिध्द केली होती. 

मुलाखतीची लिंक खाली दिली आहे