जिल्हा परिषदेच्या शाळेत शिकलेली श्रावणी नीट परीक्षेत देशात पहिली; यशाचे गुपित काय?
दौंड तालुक्यातील खडकी येथील तिच्या निवासस्थानी अनेक मान्यवर प्रत्यक्षात भेट देऊन तिच्यावर शुभेच्छांचा वर्षाव करत आहे. श्रावणीची आई व वडील दोघेही शिक्षक आहेत.
Eduvarta
एज्युवार्ता न्यूज नेटवर्क
नॅशनल टेस्टिंग एजन्सी अर्थात एनटीए तर्फे वैद्यकीय अभ्यासक्रमाच्या प्रवेशासाठी घेण्यात आलेल्या नीट परीक्षेत पुणे जिल्ह्यातील दौंड तालुक्यातील खडकी या छोट्याशा खेडेगावातील श्रावणी कृष्णा कुदळे हिने 720 पैकी 710 गुण मिळवून चमकदार कामगिरी दाखविली आहे. जिल्हा परिषदेच्या शाळेत शिक्षण घेऊनही मोठे यश संपादन करता येते हे श्रावणीने दाखवून दिले आहे. श्रावणी नीट परीक्षेत देशात पाचवी तर मुलींमध्ये देशात पहिली आहे.
श्रावणीचे इयत्ता पहिली ते पाचवीचे शालेय शिक्षण दौंड तालुक्यातील गोपाळवाडी चोरमले वस्ती येथील जिल्हा परिषद प्राथमिक शाळेत झाले. माध्यमिक शिक्षण माळेगाव येथील शारदाबाई पवार विद्यानिकेतन कॉलेजमध्ये झाले. वर्षभर मोबाईलचा वापर तिने केला नाही.तसेच समाज माध्यमांपासून दूर राहिल्याने तिला हे यश मिळाले आहे.
देशात पाचवी आणि राज्यात पहिली आल्यामुळे श्रावणीचे सर्वत्र कौतुक होत आहे. दौंड तालुक्यातील खडकी येथील तिच्या निवासस्थानी अनेक मान्यवर प्रत्यक्षात भेट देऊन तिच्यावर शुभेच्छांचा वर्षाव करत आहे. श्रावणीची आई व वडील दोघेही शिक्षक आहेत. आई जयश्री कुदळे , वडील कृष्णा कुदळे या शिक्षक दांपत्यांसह तिला तिच्या नातेवाईकांचे वेळोवेळी मार्गदर्शन लाभले.
श्रावणी हिने बारामती परिसरातील एका खाजगी क्लासमध्ये नीट परीक्षेची तयारी केली. मोबाईल आणि समाज माध्यमांपासून दूर राहिल्यामुळे अभ्यासावर अधिक लक्ष केंद्रित करता आले. सातत्यपूर्ण अभ्यास व निश्चित ध्येय ठेवून प्रयत्न केल्यास ग्रामीण भागात राहून सुद्धा आपल्याला यश संपादन करता येते,असे श्रावणी सांगते.
