शालेय अभ्यासक्रमात होणार 'योगा'चा समावेश; आयुष मंत्र्याची माहिती 

एज्युवार्ता न्यूज नेटवर्क

लहान मुला-मुलींमध्ये योगाची आवड निर्माण व्हावी, यासाठी शालेय अभ्यासक्रमामध्ये योगाचे शिक्षण (Yoga education in school curriculum) दिले जाणार असून सर्वांत महत्त्वाचे म्हणजे योगाचा खेळामध्ये समावेश करण्यात आला आहे. खेळामध्ये योगा आल्यामुळे आता शाळेसह आणि कॉलेजमध्ये देखील योगा प्रशिक्षण (Yoga training) मिळणार असल्याचे केंद्रीय आयुष आणि आरोग्य राज्यमंत्री प्रताप जाधव (Prataprao Jadhav) यांनी पत्रकार परिषदेत सांगितले. 

वैद्यकीय महाविद्यालयांमध्ये रॅगिंग होणे दुर्दैवी आहे. त्याची सर्व जबाबदारी राज्याच्या वैद्यकीय शिक्षण विभागाची असल्याचे यावेळी जाधव यांनी म्हटले. अनेक राज्यांमध्ये त्यासंदर्भात कठोर कायदे करण्यात आले आहेत. आमच्याकडे काही तक्रारी आल्यास आम्ही त्या सोडवण्याचा नक्कीच प्रयत्न करू, असे जाधव यांनी नमूद केले.

नाशिकच्या मेडिकल काॅलेजला लगेच ५००-७०० बेडचे हाॅस्पिटल उभे राहणे सध्या तरी तेवढे शक्य दिसत नाही, असे ते म्हणाले.  मात्र, त्यासाठी काही जिल्हा रुग्णालयांत आपण अशा सुविधा सुरू केल्या असल्याचे त्यांनी नमूद केले. विभागीय संदर्भ रुग्णालयात गोरगरिबांना सर्व सुविधा मिळायलाच हव्यात. किमो, डायलिसिससाठीही प्रक्रिया सुरू केली असून तालुक्यांमध्ये देखील डायलिसिस केंद्र सुरू होणार असल्याचे त्यांनी नमूद केले.

नाशिकला योग विद्यापीठ करण्याचा निर्णय २०१५ मध्ये तत्कालीन केंद्रीय आयुष मंत्रालयाच्या निर्णयाबद्दल विचारणा केल्यावर त्यासंदर्भात मागील मुख्यमंत्री एकनाथ शिंदे यांना पत्र दिल्यावर त्यांनी त्यासंदर्भात संबंधितांना सूचना दिल्या होत्या, असे सांगितले. राज्यस्तरावरही आयुष मंत्रालय व्हावे, असे आम्ही सुचवले असल्याचे जाधव यांनी नमूद केले.