पालकांच्या खिशाला कात्री, दहावी-बारावी परीक्षा शुल्कात मोठी वाढ

एज्युवार्ता न्यूज नेटवर्क

शैक्षणिक वर्ष २०२५-२६ (Academic year 2025-26)  मध्ये दहावी-बारावीत शिक्षण घेणाऱ्या विद्यार्थ्यांच्या पालकांना यंदा मोठा भुर्दंड भरावा लागणार आहे. कारण दहावी-बारावी परीक्षा शुल्कात मोठी वाढ (Increase in 10th-12th exam fees) करण्यात आली आहे. त्यामुळे पालकांच्या खिशाला कात्री लागणार आहे. महाराष्ट्र राज्य माध्यमिक व उच्च माध्यमिक शिक्षण मंडळाने (Maharashtra State Board of Secondary and Higher Secondary Education) दहावी-बारावीच्या परीक्षा शुल्कात १० टक्क्यांची वाढ करण्याचा निर्णय २४ एप्रिल रोजी घेतला आहे. आता विद्यार्थ्यांना परीक्षा शुल्कापोटी ४७० रुपयांऐवजी ५२० रुपये भरावे लागणार आहेत.

या व्यतिरिक्त १७ नंबर फॉर्म भरून परीक्षेला बसणाऱ्या खासगी विद्यार्थ्यांना १ हजार ११० रुपये नोंदणी शुल्क भरावा लागेल. शासनाने तीन वर्षात ३० टक्के परीक्षा शुल्क वाढीचा निर्णय घेतला होता. त्याप्रमाणे दरवर्षी १० टक्के वाढ करण्याचे ठरवण्यात आले. 

महाराष्ट्र राज्य माध्यमिक व उच्च माध्यमिक शिक्षण मंडळाने दहावीच्या परीक्षा शुल्कात सलग तिसऱ्यांदा वाढ केली. २०२५-२६ या शैक्षणिक वर्षासाठी दहावीच्या नियमित विद्यार्थ्यांकडून आता ५२० रुपये परीक्षा शुल्क आकारले जाणार आहे. याआधी ४७० रुपये शुल्क आकारले जात होते. आता यामध्ये ५० रुपयांची वाढ करण्याचा निर्णय कार्यकारी परिषदेच्या नुकत्याच पार पडलेल्या बैठकीत झाला. यावर पालकांनी नाराजी व्यक्त केली आहे. 

राज्य शिक्षण मंडळाच्या कार्यकारी परिषदेच्या बैठकीत परीक्षा शुल्कवाढीचा मुद्दा चर्चेला आला होता. या चर्चेनंतर निर्णय घेत फक्त परीक्षा शुल्कात वाढ झाली. इतर शुल्कांमध्ये जसे प्रशासकीय शुल्क, गुणपत्रक शुल्क व प्रमाणपत्र शुल्कात कोणताही बदल केला नाही. यामध्ये प्रत्येक प्रकारासाठी २० रुपये शुल्क कायम आहे. विद्यार्थ्यांना परीक्षेनंतर मिळणाऱ्या गुणपत्रिका व प्रमाणपत्रे लॅमिनेट स्वरूपात दिली जातात. यासाठी प्रत्येकी २० रुपये शुल्क आकारले जात आहे, हे शुल्क देखील विद्यार्थ्यांकडूनच घेतले जाते.