PRN Block विद्यार्थ्यांबाबत विद्यापीठ प्रशासन सकारात्मक ; विद्यार्थ्यांना परीक्षेची संधी मिळणार?
विद्यार्थी हिताचा निर्णय घेण्याबाबत विद्यापीठ प्रशासन सकारात्मक असल्याचे दिसून येत आहे.
Eduvarta
एज्यूवार्ता न्यूज नेटवर्क
सावित्रीबाई फुले पुणे विद्यापीठाची (Savitribai fule Pune University) संलग्न महाविद्यालयांमधील पी आर एन ब्लॉक विद्यार्थ्यांच्या (PRN block student) परीक्षेसंदर्भात विद्यापीठाच्या नुकत्याच पार पडलेल्या व्यवस्थापन परिषदेमध्ये (management council )सकारात्मक चर्चा झाली. त्यामुळे या विद्यार्थ्यांना परीक्षेची एक संधी देण्याबाबत विद्यापीठाच्या विद्या परिषदेच्या (academic council)बैठकीमध्ये हा विषय मांडून त्यावर विद्यार्थी हिताचा निर्णय घेण्याबाबत विद्यापीठ प्रशासन सकारात्मक असल्याचे दिसून येत आहे. परिणामी एक किंवा दोन विषयामुळे पदवी प्राप्त न करू शकलेल्या विद्यार्थ्यांना दिलासा मिळू शकतो.
सावित्रीबाई फुले पुणे विद्यापीठाची संलग्न असलेल्या पुणे अहमदनगर व नाशिक जिल्ह्यातील अनेक विद्यार्थी पी आर एन ब्लॉक झाल्यामुळे परीक्षेचा अर्ज भरू शकले नाहीत. त्यामुळे या विद्यार्थ्यांनी विद्यापीठाच्या अधिकाऱ्यांसह राज्याचे महसूल मंत्री राधाकृष्ण विखे पाटील यांची भेट घेतली. तसेच पीआरएन क्रमांक ब्लॉक झालेल्या विद्यार्थ्यांना शेवटची संधी उपलब्ध करून द्यावी यासाठी पाठपुरावा केला. विद्यापीठाच्या परीक्षा व मूल्यमापन मंडळाचे संचालक महेश काकडे यांनी सुद्धा युजीसीकडे या संदर्भात पाठपुरावा केला. परंतु, शुक्रवारी झालेल्या विद्यापीठाच्या व्यवस्थापन परिषदेच्या बैठकीत पी आर एन ब्लॉक विद्यार्थ्यांच्या अडचणी संदर्भात सविस्तर चर्चा करण्यात आली. त्यात विद्यार्थी हिताच्या दृष्टीने सकारात्मक चर्चा झाल्याचे विद्यापीठाच्या व्यवस्थापन परिषद सदस्यांनी सांगितले.
व्यवस्थापन परिषद सदस्य डॉ. ज्योत्स्ना एकबोटे म्हणाल्या, व्यवस्थापन परिषदेच्या बैठकीतील सर्वच सदस्यांनी ब्लॉक विद्यार्थ्यांबाबत सकारात्मक भूमिका मांडली. विद्यार्थ्यांचे शैक्षणिक नुकसान होऊ नये, यासाठी विद्या परिषदेमध्ये याबाबत चर्चा घडवून आणत विद्यार्थ्यांना दिलासा देता येऊ शकतो का? याबाबत विचार करून निर्णय घ्यावा, असे मत व्यक्त केले.
व्यवस्थापन परिषद सदस्य, डॉ.डी.बी.पवार म्हणाले, पीआरएन ब्लॉक विद्यार्थी विद्यापीठाच्या अधिकाऱ्यांना भेटून जात आहेत. त्यामुळे या विद्यार्थ्यांचा संदर्भात काही सकारात निर्णय घेता येऊ शकतो का? याबाबत व्यवस्थापन परिषदेत चर्चा झाली. तसेच त्यावरील विद्या परिषदेत विचार करण्यासंदर्भात भूमिका मांडण्यात आली.
व्यवस्थापन परिषद सदस्य संदीप पालवे म्हणाले, विद्यापीठ विद्यार्थी हिताच्या दृष्टीने नेहमीच सकारात्मक असते. विद्यापीठाच्या व्यवस्थापन परिषदेमध्ये पीआरएन ब्लॉक विद्यार्थ्यांबाबत सकारात्मक निर्णय घेण्यात आला.
-----------------------
गेली अनेक दिवस या संदर्भात विद्यापीठ प्रशांसन, UGC, राज्य केंद्रीय शिक्षण मंत्री स्तरावर पाठपुरावा सुरु आहे. यातूनच एक वर्ष दिलासा मिळाला. ज्याचा फायदा सुमारे २५ हजार विद्यार्थ्यांना झाला आहे. पण त्यानंतरही अनेक विद्यार्थी वंचित राहत होते. यावर शुक्रवारी मॅनेजमेंट कौन्सिलमध्ये सकारात्मक चर्चा झाली. NEPमध्ये प्रथम द्वितीय तृतीय वर्ष जरी पूर्ण झालेल असेल तर ड्रॉपआउट झालेल्या विद्यार्थ्यांनाही डिप्लोमा मिळतो. मग सर्व सेमिस्टरच्या एकूण ३०-४० पैकी केवळ १-२ विषय अनुत्तीर्ण झाले म्हणून जुन्या विद्यार्थ्यांना बिना पदवी ठेवून थेट नापासाचा शिक्का मारणे योग्य नाही. अत्यंत विमनस्क मनस्थितीत असलेल्या अशा हजारो विद्यार्थ्यांना सहानुभूती ठेवून शेवटची संधी द्यावी. जेणेकरून त्यांचे भवितव्य वाचेल यावर एकमत झाले. मॅनेजमेंट कौन्सिलने अशांना एक तरी संधी द्यावी यावर एकमताने होकार देवून निर्णय दिला आहे. आता अकॅडमिक कौन्सिलकडे हा प्रस्ताव दिला जाईल. तिथे यावर अंतिम निर्णय आणि स्वरूप निश्चिती होईल.
- सागर वैद्य, व्यवस्थापन परिषद सदस्य, सावित्रीबाई फुले पुणे विद्यापीठ
