ऐन निवडणुकीत शिक्षक अन् अधिकाऱ्यांचे काम वाढले; APAAR ID बाबत शिक्षण विभागाचे आदेश 

एज्युवार्ता न्यूज नेटवर्क 

राज्यातील 28.80 लाख विद्यार्थ्यांचे अपार आयडी काढण्यासाठी अद्याप नोंदणीच केली नसल्याची माहिती समोर आली असून त्यात आता शिक्षण विभागाने येत्या 30 जानेवारी 2026 पर्यंत अपार आयडी काढण्याचे काम पूर्ण करण्याच्या सूचना संबंधित विभागाच्या अधिकाऱ्यांना दिल्या आहेत. तसेच दररोज अपार आयडी संदर्भात अहवाल घेण्याच्या सूचना प्राथमिक व माध्यमिक शिक्षण अधिकाऱ्यांना देण्यात आल्या आहेत.

 राज्यातील 85.5 टक्के विद्यार्थ्यांचे अपार आयडी काढण्याचे काम पूर्ण झाले असून त्यातील 95 टक्के विद्यार्थ्यांचे आधार व्हॉलिडेशनचे काम पूर्ण झाले आहे. मात्र, अजूनही राज्यातील अनेक विद्यार्थ्यांचे अपार आयडी काढण्याची प्रक्रिया अद्याप सुरूच केली नाही. त्यामुळे केंद्रे शिक्षण सचिवांनी यावर बैठक घेऊन अपार आयडी चे काम तात्काळ पूर्ण करण्याचे आदेश दिले आहेत. जिल्हा, तालुका केंद्र स्तरावर शिबिर घेऊन प्रलंबित विद्यार्थ्यांचे अपार आयडी काढण्याचे काम पूर्ण करावे, असे निर्देश देण्यात आले आहे.

राष्ट्रीय शैक्षणिक धोरणाच्या प्रभावी अंमलबजावणीच्या दृष्टीने प्रत्येक विद्यार्थ्यांचा अपार आयडी तयार करणे आवश्यक आहे. त्यामुळे अपार आयडी काढताना काही अडचणी येत असल्यास प्राथमिक व माध्यमिक शिक्षण अधिकारी यांच्याशी संपर्क साधावा, अशाही सूचना महाराष्ट्र राज्य प्राथमिक शिक्षण परिषदचे राज्य प्रकल्प संचालक संजय यादव यांनी दिल्या आहेत.

राज्यातील 2 कोटी 15 लाख 45 हजार 194 विद्यार्थ्यांपैकी 1 कोटी 84 लाख 21 हजार विद्यार्थ्यांचे अपार आयडी तयार झाले आहेत. त्यातच अपार आयडी असल्याशिवाय सीईटी परीक्षेचा अर्ज भरता येणार नाही. सर्व प्रवेश पूर्व परीक्षेसाठी अपार आयडी बंधनकारक करण्यात आला आहे. त्यामुळे सर्व विद्यार्थ्यांना अपार आयडी काढावाच लागणार आहे.