शिक्षण मंडळातील ‘विभागीय सचिव’ पदाची जबाबदारी आता शिक्षणाधिकाऱ्यांकडे, सहसचिव पद कायमचे रद्द..

एज्युवार्ता न्यूज नेटवर्क 

महाराष्ट्र शासनाच्या शालेय शिक्षण व क्रीडा विभागाने (Education Department) एक महत्त्वाचा शासन निर्णय जारी (Govt GR issued) केला आहे. राज्यातील नऊ विभागीय मंडळांमधील ‘विभागीय सचिव’ (Divisional Secretary) पदाची कर्तव्ये व जबाबदाऱ्या शिक्षणाधिकारी (वर्ग-१) (Education Officer (Class-I)) संवर्गातील अधिकाऱ्यांकडे सोपवण्याचा निर्णय घेतला आहे. यासोबतच सर्व विभागीय मंडळांमधील ‘विभागीय सहसचिव’ हे पद कायमस्वरूपी रद्द करण्यात आले आहे. हा बदल शैक्षणिक प्रशासनाला अधिक गती आणि सुसूत्रता देण्यासाठी करण्यात आला असल्याचे शासनाकडून स्पष्ट करण्यात आले आहे.

शासन निर्णयानुसार, यापुढे विभागीय सचिव पदावर शिक्षणाधिकारी (वर्ग-१, संवर्गातील अधिकारी नियुक्त केले जातील. या अधिकाऱ्यांना विभागीय सचिवांचे सर्व विशेष प्रशासकीय अधिकार प्राप्त होतील. तसेच मंडळाच्या सर्व आर्थिक आणि प्रशासकीय सुलभ कामकाजासाठी हा घोषित करण्यात आला आहे. महाराष्ट्र माध्यमिक व उच्च माध्यमिक शिक्षण मंडळे विनियम १९७७ नुसार त्यांना सर्व कर्तव्ये पार पाडावी लागतील.

नवीन शैक्षणिक धोरण २०२० ची प्रभावी अंमलबजावणी करण्यासाठी शिक्षण विभागातील पदांची फेररचना करणे आवश्यक होते. काही उच्चपदस्थ अधिकाऱ्यांच्या बदल्या आणि स्थानांतरांमुळे विभागीय स्तरावरील कामकाजात अडथळा निर्माण होऊ नये, म्हणून हा बदल करण्यात आला. यामुळे विभागीय मंडळांची दैनंदिन कामे, परीक्षा नियोजन, निकाल जाहीर करणे, आर्थिक व्यवहार इत्यादी कार्ये अधिक वेगाने आणि पारदर्शकपणे होण्याची शक्यता आहे.

हा निर्णय केवळ प्रशासकीय अधिकाऱ्यांसाठी लागू असून, शाळेतील शिक्षक किंवा इतर कर्मचाऱ्यांना याचा थेट परिणाम होणार नाही. मात्र, विभागीय मंडळांच्या कार्यक्षमतेत वाढ होऊन १०वी-१२वी बोर्ड परीक्षांच्या प्रक्रियेत सुधारणा अपेक्षित आहे. शिक्षण विभागातील वरिष्ठ अधिकाऱ्यांनी सांगितले की, “पदांची स्पष्ट विभागणी आणि अधिकारांची एकत्रितता यामुळे मंडळाचे धोरणात्मक निर्णय आणि दैनंदिन कामकाज वेगवान होतील.