रोहित पवार यांच्यासमोर वाचला विद्यार्थ्यांनी तक्रारींचा पाढा 

एज्युवार्ता न्यूज नेटवर्क 

सावित्रीबाई फुले पुणे विद्यापीठातील हेल्थ सेंटरमध्ये सर्व आजारांसाठी एकच गोळी दिली जाते. विद्यार्थी सायंकाळी हेल्थ सेंटरमध्ये गेल्यास त्यांच्याकडून पैसे आकारले जातात. विद्यार्थ्यांना कमवा व शिका या योजनेअंतर्गत अद्याप वाढीव मानधन दिले गेले नाही, बार्टी, सारथी, महाज्योती यांच्या माध्यमातून दिल्या जाणाऱ्या फेलोशिपमध्ये असमानता आहे, अशा अनेक समस्यांचा पाढा रविवारी विद्यापीठातील विद्यार्थ्यांनी आमदार रोहित पवार यांच्यासमोर वाचला. 

केंद्रीय शिक्षण मंत्री धर्मेंद्र प्रधान यांच्या राजीनाम्यानंतर सावित्रीबाई फुले पुणे विद्यापीठात विद्यार्थ्यांनी आयोजित केलेल्या जल्लोषाच्या कार्यक्रमानिमित्त रोहित पवार यांनी विद्यापीठात भेट दिली. विद्यापीठातील जयकर ग्रंथालय समोर विद्यार्थ्यांची संवाद साधत रोहित पवार यांनी त्यांच्या समस्या जाणून घेतल्या. 

विद्यार्थी म्हणाले, विद्यापीठात वसतीगृहाची अडचण असून विद्यार्थ्यांना कमवा व शिका योजनेअंतर्गत मिळणारे मानधन तुटपुंजे आहे. दोन वेळच्या जेवणाला पुरतील एवढे पैसे सुद्धा कमवा व शिका योजनेच्या माध्यमातून विद्यार्थ्यांना मिळत नाहीत. त्यामुळे मानधनात वाढ करण्याबरोबरच विद्यार्थ्यांना चांगल्या सुविधा देण्याबाबत आपण प्रयत्न करावेत. 

विद्यार्थ्यांनी उपस्थित केलेल्या विविध प्रश्नांवर रोहित पवार यांनी मनमोकळ्या पद्धतीने संवाद साधला. स्टेनोग्राफर भरती मधील बदल,रस्त्याच्या कामांमध्ये होणारा भ्रष्टाचार, अहमदनगर जिल्हा बँकेतील पदभरती मधील गैरप्रकार यावर रोहित पवार यांनी स्पष्टपणे भाष्य केले.