आठ महिन्यांनी आली जाग ! रेल्वे अपघातात मृत्यू झालेल्या खेळाडूच्या कुटुंबाला १ लाखांची मदत
रेल्वे पूर्णपणे थांबण्यापूर्वी अर्जुन सोनवणे हा खाली उतरण्याचा प्रयत्न करत असताना त्यांचा तोल गेला आणि तो पडला. या भीषण अपघातात त्यांच्या पायांना गंभीर दुखापत झाली होती.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या धनुर्विद्या संघातील गुणवंत खेळाडू कै. अर्जुन सोनवणे याच्या रेल्वे अपघातातील दुर्दैवी निधनानंतर तब्बल आठ महिन्यांनी विद्यापीठ प्रशासनाने त्यांच्या कुटुंबीयांना १ लाखांची आर्थिक मदत जाहीर केली आहे. व्यवस्थापन परिषदेने याबाबतचा निर्णय घेतला असून, मदत जाहीर होण्यास झालेल्या विलंबाबाबत प्रश्न उपस्थित केले जात आहेत.
नोव्हेंबर २०२५ मध्ये सावित्रीबाई फुले पुणे विद्यापीठाच्या क्रीडा विभागामार्फत अखिल भारतीय आंतर-विद्यापीठ धनुर्विद्या स्पर्धेसाठी अमृतसर येथे संघ रवाना झाला होता. स्पर्धा संपल्यानंतर संघ रेल्वेने पुण्याकडे परतत असताना राजस्थानातील कोटा जंक्शन येथे हा दुर्दैवी अपघात घडला.
रेल्वे पूर्णपणे थांबण्यापूर्वी अर्जुन सोनवणे हा खाली उतरण्याचा प्रयत्न करत असताना त्यांचा तोल गेला आणि तो पडला. या भीषण अपघातात त्यांच्या पायांना गंभीर दुखापत झाली होती. मोठ्या प्रमाणावर रक्तस्राव झाल्याने त्यांला तातडीने रुग्णालयात दाखल करण्यात आले होते. वैद्यकीय पथकाने शर्थीचे प्रयत्न केले; मात्र उपचारादरम्यान त्याची प्राणज्योत मालवली.
कै. अर्जुन सोनवणे हा मराठा विद्या प्रसारक समाज महाविद्यालय, केडगाव येथे बी.ए. द्वितीय वर्षात शिक्षण घेत होता. तो विद्यापीठाच्या धनुर्विद्या (मुले) संघातील आश्वासक आणि गुणवंत खेळाडू म्हणून ओळखला जात होता. त्यांच्या अकाली निधनामुळे विद्यापीठासह क्रीडा क्षेत्रात हळहळ व्यक्त करण्यात आली होती.
दरम्यान, विद्यापीठाच्या व्यवस्थापन परिषदेने अर्जुन सोनवणे यांच्या निधनाबद्दल शोक व्यक्त करत त्यांच्या कुटुंबीयांना १ लाखांची आर्थिक मदत देण्याचा निर्णय घेतला आहे. मात्र, अपघातानंतर तब्बल आठ महिन्यांनी ही मदत देण्याच्या प्रस्तावास मंजूरी मिळाली.त्यामुळे प्रशासनाच्या कार्यपद्धतीवर प्रश्नचिन्ह उपस्थित होत आहे.अशा संवेदनशील प्रकरणांमध्ये निर्णयप्रक्रिया अधिक तत्पर होण्याची अपेक्षा व्यक्त केली जात आहे.
