साताऱ्याचं वेगळंच पाणी, पहिलीतलं पोरगंही बोलतंय जपानी!

एज्युवार्ता न्यूज नेटवर्क

आपली मुले शाळेत गेली की त्यांना इंग्रजी वाचता-बोलता आले पाहिजे, असा आई-वडिलांचा आग्रह असतो. त्यासाठी मग केजीपासूनच मुलांची घरातही शाळा भरवली जाते. शहरांप्रमाणे ग्रामीण भागातही आता इंग्रजीची मागणी वाढू लागली आहे. पण कायम दुष्काळी असलेल्या सातारा (Satara) जिल्ह्यातील माण तालुक्यातील एका जिल्हा परिषदेच्या (Zilla Parishad) शाळेत मराठी-इंग्रजी तर सोडाच थेट परदेशी भाषांवर वर्चस्व गाजवू लागले आहेत. कल्पक शिक्षकांच्या अभिनव प्रयोगामुळे या पोरांनी थेट जपानी भाषेला (Japanese Language) गवसणी घातली आहे. (EduVarta Latest News) 

शिक्षणविषयक ताज्या बातम्यांसाठी येथे क्लिक करा. http://eduvarta.com/

माण तालुक्यातील विजयनगर येथील जिल्हा परिषदेची शाळा व तेथील शिक्षक बालाजी जाधव (Balaji Jadhav) यांनी ग्रामीण भागातील विद्यार्थ्यांना जागतिक व्यासपीठ मिळवून देण्यासाठी जोरदार प्रयत्न सुरू केले आहेत. त्याचाच एक भाग म्हणजे या शाळेतील  इयत्ता पहिली ते चौथीपर्यंतचे विद्यार्थी आता चक्क जपानी भाषा शिकत आहेत. कोणताही जपानी माणूस बोलताना दिसला तर या विद्यार्थ्यांना शंभर टक्के ते समजू शकते. कोणतेही शब्द, वाक्ये, अंक, रक्कम इत्यादी ते ओळखू व वाचन बोलणे सहजपणे करू शकतात.

याविषयी सांगताना बालाजी जाधव म्हणाले, आज समाजातील खूप सारे तरूण पदवीनंतर परदेशात नोकरी साठी प्रयत्न करतात. मात्र, त्या देशाची भाषा अवगत नसल्याने त्यांना ती नामी संधी मिळत नाही. विजयनगरच्या ग्रामीण गोरगरीब विद्यार्थ्यांना भविष्यात अशी समस्या येऊ नये म्हणून त्यांनी प्राथमिक शाळेतच त्यांना जपानी भाषेचे धडे देण्यास सुरुवात केली व अगदी काही महिन्यात या शाळेतील विद्यार्थी जपानी भाषेत वाचन, लेखन, संवाद, गणिते व दैनदिन संवाद साधण्यात तरबेज झाले आहेत.

हेही वाचा : 'आधार'वरील संच मान्यतेला न्यायालयात देणार आव्हान

सर्व प्रथम २ ते ३ आठवडे आम्ही विद्यार्थ्यांना युट्युब वरील जपानी भाषेचे व्हिडिओ दाखवून त्यांना श्रवण व पाहणे अशी सुरुवात केली. काही बेसिक गोष्टी त्यांना समजू लागल्यावर जपानी भाषेतील संवाद दाखवण्यास सुरुवात केली व विद्यार्थ्यांनाही यात रस वाटू लागला. जपानी भाषेत ३ प्रकारच्या लिपी असतात त्यातील हिरागाना नावाची लिपी आम्ही विद्यार्थ्यांना शिकवण्यास सुरुवात केली. त्यातील ५-५ अक्षरे शिकवून  त्याचे वाचन व लेखन आम्ही फावल्या वेळेत घेवू लागलो. प्रामुख्याने डीयूलींगो या APP व युट्युबचा आम्हाला यामध्ये खूप फायदा झाला. एखादी बाब मी २ ते ३ दिवसात शिकलो तर विद्यार्थी मात्र एका दिवसात ते शिकायचे हाही अनुभव मला शिक्षक म्हणून याद्वारे जाणवल्याचे जाधव यांनी सांगितले.

विशेषतः इयत्ता १ ली चे विद्यार्थी खूप सहजतेने शिकत होते. दोन महिन्यात मिळेल तसा वेळ यासाठी देवून अक्षरे, अंक, वाचन, लेखन, संवाद या सर्व बाबी शाळेने चांगल्याप्रकारे पूर्ण केल्या. कोणतीही भाषा श्रवण, भाषण संभाषण, वाचन व लेखन या प्रकारे उत्तम शिकता येते. मग छोटे छोटे संवाद ४ ते ५ ओळीच्या गटागटाने घ्यायला सुरुवात केली आणि या पद्धतीने खूप कमी वेळेत आकलन होत गेले. मग अक्षरा पासून छोटे शब्द तयार करून त्याचे वाचन व जपानी लिपीत छोटे-छोटे शब्द लेखनातही चांगली गती येवू लागली. विद्यार्थी जपानी भाषेतील, प्राणी, पक्षी, वार, महिने, फळे, फुले, नातेवाईक, कृती, दैनंदिन शब्द व वाक्य वाचन, बोलणे हे सहजपणे करू लागले. साधारण चार महिन्याचा या सर्व बाबी शिकण्यास वेळ लागला.

अंक व गणिते यावर भर देवून सर्व अंक मराठी व जपानी भाषेत वाचन, लेखन शिकलो व आज घडीला सर्व विद्यार्थी नुसते अंक ओळखतच नाहीत तर जपानी भाषेत त्याचे लेखन तर करतच आहेत. त्यापलीकडे जपानी भाषेत बेरीज, वजाबाकी, गुणाकार, भागाकार सुद्धा करत आहेत, असे जाधव यांनी कौतुकाने सांगितले. परदेशी भाषा शिकण्यास एकीकडे हजारो रुपये शिकवणी वर्गासाठी लोक घालवतात मात्र इतक्या ग्रामीण भागात ही मुले अशी अभिनव शिकत असल्याने पालक खूप खुश आहेत. मुले घरीही छोटी छोटी वाक्ये बोलतात. पालकांना ते समजत नाही. मात्र काहीतरी वेगळे शिकत आहेत याचा त्यांना आनंद व अभिमान आहे. प्रत्येक विद्यर्थ्याला जपानीसाठी एक वेगळी वही शाळेतून दिली असून त्यामध्येच त्याचा सराव करतात. छोटे शब्द ,वाक्ये आता ऐकुन सुद्धा लिहू शकतात.

इतक्या लहान वयात मुलांना एक वेगळी परदेशी  भाषा शिकण्याची संधी बालाजी जाधव यांच्यासारख्या कल्पक शिक्षकांमुळे ग्रामीण विद्यार्थ्यांना प्राप्त झाली आहे. या सर्व विद्यार्थ्यांना त्यांच्या भविष्यात याचा खूप मोठा लाभ होईल, अशी खात्री त्यांना आहे. दरवर्षी अशी एक वेगळी भाषा मुलांना दैनंदिन अभ्यासासोबत शिकवण्याचा संकल्प असल्याचेही त्यांनी सांगितले.