अलिगढ मुस्लीम विद्यापीठात मराठी भाषा शिकण्यासाठी विद्यार्थ्यांची ओढ

एज्युवार्ता न्यूज नेटवर्क

महाराष्ट्रात मराठी विरुद्ध हिंदी भाषेचा वाद पेटला असतानाच उत्तर भारतातील विद्यार्थी मराठी भाषेकडे अकर्षित झाले असल्याचे आशादायी चित्र समोर आले आहे. अलिगढ मुस्लीम विद्यापीठात (Aligarh Muslim University) उत्तर भारतातील विद्यार्थी मराठी भाषा (Marathi language) शिकत आहेत. महाराष्ट्रात रोजगाराचे प्रमाण जास्त आहे. या पार्श्वभूमीवर देशाची आर्थिक राजधानी आणि 'स्वप्नांचे शहर' मुंबईत जाऊन मोठा माणूस बनण्याचे स्वप्न बाळगणारे तरुण मराठी शिकत आहेत. एकीकडे हा वाद सुरू असताना हे चित्र सुखावह असल्याचे 'एएमयू'च्या मराठी विभागाचे प्रभारी डॉ. ताहेर पठाण (In-charge of Marathi Department Dr. Taher Pathan) यांनी माध्यमांशी बोलताना सांगितले.

मोठी दुर्घटना : शाळेचा छत कोसळून ५ विद्यार्थ्यांचा मृत्यू, ३० जण जखमी

एएमयूच्या आधुनिक भारतीय भाषा विभागात या वर्षी ४१० विद्यार्थी मराठी शिकत आहेत. ज्यामध्ये बिहार, उत्तर प्रदेश जम्मू काश्मीर, हिमाचल प्रदेश, उत्तराखंड, हरियाणा, पंजाब, राजस्थानमधील विद्यार्थ्यांचा समावेश आहे. या विद्यार्थ्यांना भाषेवरून सुरू असलेल्या राजकारणाशी काहीही देणेघेणे नाही. त्यांच्यासाठी 'रोजगार' महत्त्वाचा आहे. एएमयूमध्ये १९८८ मध्ये मराठी विभाग सुरू झाला. २०१५ ते २०२५ या १० वर्षांच्या काळात ४०० विद्यार्थ्यांपर्यंतचा आशादायी टप्पा पूर्ण झाला आहे. अनेक विद्यार्थी पीएच.डी. करत आहेत.

रोजगार, संशोधन, शिक्षण ही मराठी शिकण्यामागील कारणे आहेत. याशिवाय चित्रपटसृष्टीचे मुंबई, तर कलेचे पुणे माहेरघर आहे. अभिनेते होण्याचे स्वप्न पाहणारे, अनुवाद, लेखन क्षेत्रात जाण्याची इच्छा असलेले विद्यार्थी मराठीला प्राधान्य देतात. हिंदी-मराठीतील संत, दलित साहित्यातील साधर्म्यामुळेही काही विद्यार्थी हे भाषेचे प्रेम म्हणून शिकतात.