अकरावी प्रवेशासाठी विद्यार्थ्यांना पहिल्याच दिवशी अडचण; सुधारित वेळापत्रक आज जाहीर होणार

एज्युवार्ता न्यूज नेटवर्क

राज्य शिक्षण विभागाने अकरावीच्या प्रवेशासाठी ऑनलाइन (11th Admission Process 2025-26) पद्धतीचा अवलंब करण्याचा निर्णय घेतला असून, २१ मे २०२५ पासून ही प्रक्रिया सुरू होणार होती. मात्र, प्रवेशासाठी असलेले पोर्टल बंद असल्याने पहिल्याच दिवशी विद्यार्थी आणि पालकांनी तीव्र नाराजी व्यक्त केली. त्याच पार्श्वभूमीवर आता शिक्षण संचालनालयाने सुधारित वेळापत्रक जाहीर करणार असल्याचे स्पष्ट केले आहे. त्यानुसार गुरुवारी (दि. २२) दुपारी ३ वाजता फेरी क्रमांक १ (First round schedule) बाबतचे सविस्तर वेळापत्रक घोषित करण्यात येणार आहे. शिक्षण संचालक डॉ. महेश पालकर (Teaching Director Dr. Mahesh Palkar) यांनी प्रसिद्धीपत्रकाद्वारे ही माहिती दिली आहे.

माध्यमिक व उच्च माध्यमिक शिक्षण मंडळाने जाहीर केलेल्या वेळापत्रकानुसार, अकरावी ऑनलाइन प्रवेश प्रक्रिया प्रणालीचा विद्यार्थी आणि पालकांना सराव करता यावा म्हणून हे पोर्टल तीन दिवस आधीच सुरू केले होते. अकरावीच्या प्रवेशाची पहिली फेरी २१ मेपासून सुरू होणार होती मात्र विद्यार्थ्यांना आलेल्या अडचणी पाहता फेरी क्रमांक १ चे सविस्तर वेळापत्रक जाहीर करण्यात येणार आहे.

पोर्टलवर अर्ज भरण्याची सुरुवात विलंबाने होत असली तरी विद्यार्थ्यांना अर्ज भरण्यास व पसंतीक्रम नोंदवण्यास पुरेसा कालावधी देण्यात येईल. प्रवेशाचे पोर्टल परिपूर्ण व उत्कृष्ट स्वरूपात उपलब्ध झालेले असेल. अगदी छोट्यात छोटी देखील समस्या राहू नये, यासाठी प्रयत्न करण्यात येत आहेत. प्रवेशाचे पोर्टल सुरू होण्याची वेळ ऑनलाइन दर्शविण्यात येईल. तसेच विद्यार्थ्यांना ई-मेल व मोबाइल संदेशाद्वारे कळविण्यात येईल. पोर्टल सुलभ व त्रुटीरहित करून सुरू करण्याची कार्यवाही करण्यात येत आहे. याबरोबरच सुधारित पोर्टलमुळे विद्यार्थ्यांना अर्ज भरणे सोयीचे होईल. त्याचबरोबर प्रवेशाची कार्यवाही कमीत कमी वेळात पूर्ण करण्यासाठी आवश्यक सर्व उपाय सुरू आहेत. अर्ज करण्यासाठी पुरेसा वेळ देण्यासह उचित सोयी-सुविधा, मार्गदर्शन केले जाईल. त्यामुळे पालक असो अथवा विद्यार्थी कोणीही गोंधळून जाऊ नये असे आवाहन शिक्षण संचालक डॉ. महेश पालकर यांनी केले आहे.

अधिकृत माहितीसाठी विद्यार्थ्यांनी https://mahafyjcadmissions.in/landing या अधिकृत वेबसाईटला भेट द्यावी.