पुष्प प्रदर्शनातील विविध मनमोहक फुलांची विद्यार्थ्यांना भुरळ 

एज्युवार्ता न्यूज नेटवर्क 

पुष्प प्रदर्शनातील विविध मनमोहक फुलांनी शेतकरी, विद्यार्थ्यांना भुरळ घातली. राज्यस्तरीय कृषी प्रदर्शनात (State-level agricultural Exhibition) पहिल्याच दिवशी ५० हजारांवर शेतकऱ्यांनी भेट देत डॉ. पंजाबराव देशमुख कृषी विद्यापीठासह (Dr. Punjabrao Deshmukh Agricultural University) राज्यातील तीनही कृषी विद्यापीठाचे नवे तंत्रज्ञान, संशोधन जाणून घेतले.

यावर्षीच्या अॅग्रोटेक -२०२४ कृषी प्रदर्शनीचे प्रमुख आकर्षण ठरत असून, उद्यानविद्या विभागाच्या दालनातील विकसित विविध फळपिकाचे वाण, भाजीवर्गीय पिकाचे वाण तसेच विविध फळांच्याद्वारे तयार करण्यात आलेले प्रक्रियायुक्त पदार्थ शेतकरी तसेच विद्यार्थ्यांचे आकर्षण ठरत आहे.

वनविद्या महाविद्यालयच्या दालनामध्ये वनशेतीसोबतच अखिल भारतीय समन्वय कृषी वनशेती संशोधन प्रकल्प यांच्यामार्फत विविध जातीचे बांबू प्रदर्शित करण्यात आले असून, व्यावसायिक लागवडीबद्दल माहिती शेतकऱ्यांना देण्यात येत आहे. कृषी पद्धती व पर्यावरण केंद्र यांच्या धरणामध्ये नैसर्गिक शेतीचे मॉडेल साकारण्यात आले आहे.

वनस्पती रोगशास्त्र विभागाच्या दालनामध्ये विविध जैविक औषधे, बुरशीनाशके प्रदर्शित करण्यात आले असून विक्रीकरिता उपलब्ध केलेली आहेत. मृद विज्ञान विभाग यांच्या दालनामध्ये विभागाद्वारे विकसित केलेले द्रवरूप खत प्रदर्शित करण्यात आले आहे. नवे तंत्रज्ञान शेतकऱ्यांच्या बांधापर्यंत पोहोचावे, यासाठी प्रयत्न करणार असल्याचे कृषी मंत्री माणिकराव कोकाटे यांनी मत व्यक्त केले आहे.