लातूर मधील शालेय विद्यार्थिनींचा लैंगिक छळ; पालकांचा संताप, पोलिसांकडून गुन्हा दाखल 

एज्युवार्ता न्यूज नेटवर्क 

लातूर येथील यशवंत विद्यालयातील शिक्षकेतर कर्मचाऱ्याकडून शालेय विद्यार्थ्यांचा लैंगिक छळ केला जात असल्याची तसेच त्यांना अश्लील टोमणे मारले जात असल्याची धक्कादायक माहिती समोर आली. याबाबतची माहिती विद्यार्थ्यांनी शिक्षकांना सांगूनही शिक्षकांनी  कोणतेही पाऊल उचलले नाही. त्यामुळे लातूर पोलिसांनी संबंधित शिक्षकेतर कर्मचाऱ्यासह माहिती लपवणाऱ्या शिक्षकांवर गुन्हा दाखल केला आहे. 

शाळेतील शिक्षकेतर कर्मचारी विद्यार्थिनींना अश्लील बोलत असल्यामुळे विद्यार्थ्यांनी याबाबत आपल्या शिक्षकांकडे तक्रार दिली. परंतु, त्याबद्दल कोणतीही कारवाई होत नसल्याने विद्यार्थ्यांनी आपल्या पालकांना शाळेत बोलवले. त्यानंतर सर्व पालकांनी याबाबत शाळा प्रशासनाला जाब विचारून संबंधित शिक्षकेतर कर्मचारी व शिक्षकांवर कारवाईची मागणी केली. परिसरातील सामाजिक कार्यकर्ते तसेच माजी लोकप्रतिनिधींनी याबाबत शाळा प्रशासनाला धारेवर धरले. आमच्या मुली जर शाळेत सुरक्षित नसतील तर आम्ही मुलींना शाळेत पाठवणार नाही, अशी भूमिका पालकांनी बोलून दाखवली.

मालेगाव येथील घटना ताजी असताना लातूर येथे घडलेल्या या घटनेमुळे पालकांनी संताप व्यक्त केला. तसेच लातूर मधील महिला शांत बसणार नाही. शाळेच्या मुख्याध्यापकांनी व शाळा प्रशासनाने पालकांना लेखी द्यावे की , येथे शिक्षण घेण्यासाठी येणाऱ्या मुली सुरक्षित आहेत. तेव्हाच आम्ही आमच्या मुलींना या शाळेत शिक्षण घेण्यासाठी पाठवू, असे पालकांनी बजावून सांगितले. घडलेल्या प्रकाराची माहिती पोलिसांना दिल्यानंतर पोलिसांनी याप्रकरणी संबंधित शिक्षकेतर कर्मचाऱ्या विरोधात तसेच माहिती लपवणाऱ्या शिक्षकांविरोधात गुन्हा दाखल केला. 

शाळेच्या मुख्याध्यापकांनी प्रमुख या नात्याने याबाबत विद्यार्थीनीचे म्हणणे एेकूण घेतले पाहिजे होते. मुलींच्या सक्षमीकारणांसाठी व सुरक्षेसाठी वारंवार विविध उपक्रम राबवले जातात. शासन व प्रशासन याबाबत संवेदनशील आहे.तरीही असे प्रकार घडत असेल तर लातूर जिल्ह्यातील सर्व शिक्षकांनी व संस्थाचालकांनी याबाबत गांभीर्याने दखल घेऊन शाळेत येणाऱ्या मुली सुरक्षित राहतील, याची दक्षता घ्यावी,असे लातूरच्या शिक्षण अधिकारी यांनी सांगितले.