विद्यापीठाला कुणी कुलसचिव देतं का कुलसचिव..
विद्यापीठाला पूर्णवेळ कुलसचिव मिळणे दूरच राहिले. परंतु, आता एखाद्या प्राध्यापकाकडे प्रभारी कुलसचिव पद देणेही विद्यापीठाला शक्य होत नाही का ?असा प्रश्न आता उपस्थित होऊ लागला आहे.
eduvarta@gmail.com 
एज्युवार्ता न्यूज नेटवर्क
पुणे, अहिल्यानगर आणि नाशिक या तीन जिल्ह्याचे कार्यक्षेत्र असणाऱ्या..., साडे सात लाखाहून अधिक विद्यार्थ्यांची परीक्षा घेणाऱ्या..., पूर्णवेळ अधिष्ठाता आणि पूर्णवेळ कुलसचिवांविना आणि अपुऱ्या प्राध्यापकांसह आणि अपुऱ्या शिक्षकेतर कर्मचाऱ्यांसह चालणाऱ्या ऑक्सफर्ड ऑफ द ईस्ट अर्थात सावित्रीबाई फुले पुणे विद्यापीठाला कुणी कुलसचिव देतं का कुलसचिव? अशी म्हणण्याची वेळ आता आली आहे.कारण विद्यापीठाला पूर्णवेळ व प्रभारी कुलसचिव सुद्धा मिळत नसल्याची माहिती समोर आली आहे.
सावित्रीबाई फुले पुणे विद्यापीठाला पूर्णवेळ अधिष्ठाता आणि पूर्णवेळ कुलसचिव नसल्यामुळे अनेक शैक्षणिक व प्रशासकीय अडचणींचा सामना करावा लागतो. विद्यापीठाने पूर्णवेळ कुलसचिव पदाची भरती प्रक्रिया सुमारे वर्षभरापूर्वी राबवली होती. परंतु, त्यात गोंधळ झाल्याने ही भरती प्रक्रिया स्थगित करावी लागली. त्यामुळे विद्यापीठाला दोन वेळा प्रभारी कुलसचिव नियुक्त करावे लागले. विद्यापीठातील विविध विभागांमधील प्राध्यापकांकडे कुलसचिव पदाची जबाबदारी देण्यात आली. मात्र, गेल्या काही दिवसांपासून विद्यापीठाच्या कुलसचिव पदाचा पदभार वित्त व लेखा अधिकारी यांच्याकडे देण्यात आला आहे. त्यामुळे विद्यापीठाला पूर्णवेळ कुलसचिव मिळणे दूरच राहिले. परंतु, आता एखाद्या प्राध्यापकाकडे प्रभारी कुलसचिव पद देणेही विद्यापीठाला शक्य होत नाही का ?असा प्रश्न आता उपस्थित होऊ लागला आहे.
विद्यापीठाच्या प्रभारी कुलसचिव डॉ.ज्योती भाकरे यांनी राजीनामा दिल्याची चर्चा सध्या विद्यापीठ वर्तुळात आहे. त्यामुळेच गेल्या काही दिवसांपासून विद्यापीठाच्या वित्त व लेखा अधिकारी चारुशीला गायके यांच्याकडे कुलसचिव पदाचा अतिरिक्त पदभार देण्यात आला आहे. कुलसचिव हे विद्यापीठातील अत्यंत महत्त्वपूर्ण पद असून विद्यापीठाच्या प्रशासनाची सर्व धुरा कुलसचिव यांच्या खांद्यावर असते. मात्र, कुलसचिव नसल्यामुळे विद्यापीठाचे कामकाज करणे प्रशासनाला अडचणीचे झाले आहे.
सावित्रीबाई फुले पुणे विद्यापीठाचा वर्धापन दिन येत्या 10 फेब्रुवारी रोजी असून या कार्यक्रमाच्या नियोजनाची जबाबदारी हा अत्यंत महत्त्वाचा भाग आहे. विद्यापीठाचे प्रशासकीय प्रमुख या नात्याने कुलसचिव यांच्यातर्फे या कार्यक्रमाची तयारी केली जाते. परंतु, पूर्णवेळ सोडाच प्रभारी कुलसचिव सुद्धा नियुक्त केले जात नसल्यामुळे विद्यापीठ अडचणीत सापडले आहे. त्यामुळे या विद्यापीठाला कोणी कुलसचिव देतं का कुलसचिव ? असे म्हणण्याची वेळ आली असल्याचे विद्यापीठातील काही कर्मचाऱ्यांकडून सांगितले जात आहे.
