SPPU 'मॅनेजमेंट कौन्सिल' पुण्याबाहेर; पण अजून अजेंडाच ठरला नाही, सदस्य नाराज

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University)व्यवस्थापन परिषदेची बैठक (Management Council meeting)येत्या 26 एप्रिल रोजी आयोजित करण्यात आले आहे. परंतु, नेहमीप्रमाणे ही बैठक विद्यापीठातील सभागृहात होणार नाही तर अहिल्यानगर जिल्ह्यातील एका खाजगी शैक्षणिक संस्थेत ही बैठक आयोजित करण्यात आली आहे. यावरून गेल्या काही दिवसांपासून टीका होत आहे. मात्र, त्याहून धक्कादायक बाब म्हणजे व्यवस्थापन परिषदेच्या बैठकीला तीन दिवस उरलेले असताना अद्याप एकाही सदस्याला बैठकीचा अजेंडा (Meeting agenda)काय असणार आहे, याबाबत कोणतीही कल्पना नाही. तसेच विद्यापीठ प्रशासनाने याबाबत अद्याप सदस्यांना लेखी माहिती कळवलेली नाही. त्यामुळे विद्यापीठाच्या प्रशासकीय कारभाराबाबत व्यवस्थापन परिषदेच्या काही सदस्यांनी 'एज्युवार्ता' शी बोलताना नाराजी व्यक्त केली आहे. 

सावित्रीबाई फुले पुणे विद्यापीठाचे कार्यक्षेत्र पुणे, अहिल्यानगर आणि नाशिक या तीन जिल्ह्यांमध्ये विस्तारलेले आहे. त्यातही अहिल्यानगर व नाशिक या दोन जिल्ह्यांमध्ये विद्यापीठाचे स्वतंत्र उपकेंद्र उभारण्यात आले आहे. त्यातील नाशिक उपकेंद्राचे उद्घाटन अद्याप झाले नाही. विद्यापीठाच्या व्यवस्थापन परिषदेच्या बैठका मुख्यत्वे मुख्य इमारतीमधील सभागृहात पार पडलेल्या आहेत. माझी कुलगुरू नरेंद्र जाधव यांच्या कार्यकाळात या बैठका इतर जिल्ह्यांमध्ये झाल्याचे बोलले जात आहे.त्यातही या बैठका उपकेंद्रात आयोजित करता आल्या असत्या. परंतु, येत्या 26 एप्रिल रोजी अहिल्यानगर येथील खासगी शिक्षण संस्थेमध्येच व्यवस्थापन परिषदेची बैठक पार पडणार असल्याचे विश्वसनीय सूत्रांकडून सांगितले जात आहे.

दरम्यान, पुणे विद्यापीठातील विद्यार्थ्यांना रिफेक्टरीमधून दर्जेदार, सकस व कमी किमतीत अन्न उपलब्ध व्हावे, या उद्देशाने विद्यापीठ प्रशासनाकडून प्रयत्न केले जात आहेत. शिर्डी संस्थानच्या माध्यमातून भाविकांना अन्नदान केले जाते. त्यामुळे विद्यापीठाच्या व्यवस्थापन परिषदेच्या सदस्यांकडून शिर्डी संस्थानला भेट दिली जाणार असल्याची चर्चा केली जात आहे. मात्र,अद्याप विद्यापीठ प्रशासनाकडून या संदर्भातील कोणतीही अधिकृत माहिती प्रसिद्ध करण्यात आलेली नाही. 

पुणे विद्यापीठाचा विभाग असणाऱ्या नाशिक उपकेंद्राचे काम पूर्णत्वास आले आहे. या उपकेंद्राच्या उद्घाटनाचा कार्यक्रम केव्हा आयोजित करणार याबाबत नुकत्याच झालेल्या अधिसभेच्या बैठकीमध्ये मोठा वादंग निर्माण झाला होता. त्यामुळे व्यवस्थापन परिषदेच्या सदस्यांकडून नाशिक उपकेंद्राची पाहणी करून उद्घाटनाचा कार्यक्रम ठरवला जाऊ शकतो. मात्र, याबाबत कोणीही अधिकृत माहिती देण्यास उपलब्ध नाही. त्यामुळे व्यवस्थापन परिषदेची बैठक कुठे होणार? यापेक्षा महत्त्वाचा विषय म्हणजे या बैठकीत विद्यार्थी,  प्राध्यापक, शिक्षकेतर कर्मचारी यांच्या हिताबाबत  कोणत्या विषयावर चर्चा होणार आहे, हेच अद्याप निश्चित झालेले नाही. कारण विद्यापीठाने अद्याप व्यवस्थापन परिषदेच्या सदस्यांना बैठकीचा अजेंडाच पाठविलेल्या नाही,असे विश्वासनीय सूत्रांनी सांगितले.