फार्मसी अभ्यासक्रमाची तिसरी फेरी सुरू; १३ डिसेंबरपासून प्रवेश निश्चित

एज्युवार्ता न्यूज नेटवर्क 

आचारसंहितेच्या कचाट्यात अडकलेली बी. फार्मसी आणि एम. फार्मसी अभ्यासक्रमाची (B. Pharmacy and M. Pharmacy courses) प्रवेश प्रक्रिया अखेर सुरू (Admission process begins) झाली आहे. या अभ्यासक्रमांच्या तिसऱ्या फेरीतील प्रवेशासाठी विद्यार्थ्यांना सोमवारी, ९ डिसेंबरपर्यंत अर्ज सादर करता येतील. तर १२ डिसेंबर रोजी अंतिम गुणवत्ता यादी प्रसिद्ध (Final merit list published on December 12) होणार आहे. त्यानंतर लगेच दुसऱ्या दिवशीपासून म्हणजे १३ डिसेंबर पासूनप्रवेश निश्चित करून तो घेता येईल. 

सर्वोच्च न्यायालयाने फार्मसी कॉलेजांची मान्यता प्रक्रिया यंदा ३१ ऑक्टोबरपर्यंत राबविण्याचे निर्देश फार्मसी कौन्सिल ऑफ इंडियाला दिले होते. तसेच या महाविद्यालयांच्या मान्यता प्रक्रियेवर हरकती अथवा सूचना देण्याची मुदत ३० नोव्हेंबरपर्यंत दिली होती. त्यानुसार यंदा पीसीआयने ३० नोव्हेंबरपर्यंत प्रवेश प्रक्रिया राबविण्याचे निर्देश विविध राज्यांच्या प्रवेश प्रक्रिया राबविणाऱ्या प्राधिकरणांना दिले होते.

राज्यात विधानसभा निवणूक आचारसंहिता २५ ऑक्टोबरपासून लागली. परिणामी, पीसीआयने मान्यता देऊनही आचारसंहितेमुळे राज्य सरकारला नव्या महाविद्यालयांना मान्यता देता आली नाही. त्यामुळे महाविद्यालयांचा या प्रवेश प्रक्रियेत समावेश होऊ शकत नसल्याने फार्मसी अभ्यासक्रमांच्या प्रवेशांना राज्य सरकारने स्थगिती दिली होती.

सद्यःस्थितीत बी. फार्मसी अभ्यासक्रमाच्या प्रवेशाच्या दोन फेऱ्या पूर्ण झाल्या आहेत. या दोन फेऱ्यांमध्ये तब्बल २१ हजार ९१७ विद्यार्थ्यांचे प्रवेश झाले आहेत. तर एम. फार्मसीचे २ हजार २२२ विद्यार्थ्यांचे प्रवेश झाले आहेत. तिसऱ्या फेरीसाठी ९ डिसेंबरपर्यंत अर्ज भरता येणार आहेत. त्यानंतर १२ डिसेंबर रोजी गुणवत्ता यादी प्रदर्शित केली जाईल. विद्यार्थ्यांना १३ डिसेंबर ते १६ डिसेंबरदरम्यान लॉगिनमधून प्रवेशासाठी जागा स्वीकारून कॉलेजांत जाऊन प्रवेश घ्यावा लागेल. तिसऱ्या फेरीनंतर रिक्त जागांवर कॉलेजांना संस्थात्मक स्तरावर १८ डिसेंबर ते २३ डिसेंबरदरम्यान प्रवेश प्रक्रिया राबविता येईल.