PRN Block : या विद्यार्थ्यांना परीक्षेच्या दोन संधी उपलब्ध; हजारो विद्यार्थ्यांना मिळणार लाभ
विद्यापीठाने पीआरएन अनब्लॉक केलेल्या विद्यार्थ्यांना ऑक्टोबर नोव्हेंबर 2024 आणि मार्च एप्रिल 2025 या परीक्षा देण्याची संधी उपलब्ध करून दिली आहे.
eduvarta@gmail.com 
एज्युवार्ता न्यूज नेटवर्क
(राहूल शिंदे )
PRN Block NEWS: सावित्रीबाई फुले पुणे विद्यापीठाच्या (Savitribai Phule Pune University)अनेक विद्यार्थ्यांचा सत्र पूर्ततेचा कालावधी (Session completion period) संपुष्टात आल्यामुळे विद्यापीठाच्या परीक्षा विभागाने (Examination Department of the University)या विद्यार्थ्यांचे पीआरएन क्रमांक ब्लॉक (PRN Number Block) केले होते. परंतु,विद्यापीठ अनुदान आयोगाने (UGC)दिलेल्या निर्देशाप्रमाणे आणि विद्या परिषदेने दिलेल्या मान्यतेनुसार काही अभ्यासक्रमाच्या विद्यार्थ्यांना परीक्षेच्या दोन संधी (Two exam opportunities) उपलब्ध करून देण्यात आल्या आहेत. त्यामुळे हजारो विद्यार्थ्यांना परीक्षेला प्रविष्ट होता येणार आहे.तसेच या विद्यार्थ्यांचे होणारे शैक्षणिक नुकसान टाळणार आहे.
विद्यापीठ अनुदान आयोगाच्या नियमानुसार विद्यार्थ्यांनी ठराविक कालावधीमध्ये पदवी अभ्यासक्रम पूर्ण करणे बंधनकारक आहे. परंतु, यूजीसीने निश्चित केलेला सत्र पूर्ततेचा कालावधी उलटून गेला तरी अनेक विद्यार्थी पदवी परीक्षा उत्तीर्ण झाले नाहीत. त्यामुळे विद्यापीठाच्या परीक्षा विभागाने संबंधित विद्यार्थ्यांचे पी आर एन क्रमांक ब्लॉक केले होते. परिणामी या विद्यार्थ्यांना परीक्षा अर्ज भरता येत नव्हता. मात्र, विद्यापीठाने पीआरएन अनब्लॉक केलेल्या विद्यार्थ्यांना ऑक्टोबर नोव्हेंबर 2024 आणि मार्च एप्रिल 2025 या परीक्षा देण्याची संधी उपलब्ध करून दिली आहे. या विद्यार्थ्यांचे अर्ज टप्प्याटप्प्याने भरून घेतले जाणार आहेत. तसेच या विद्यार्थ्यांची परीक्षा नियोजित कालावधीतच होणार आहे.
विद्यापीठाने प्रसिद्ध केलेल्या सत्र पूर्तता कालावधीचा विचार करून संबंधितांनी महाविद्यालयीन पातळीवर विद्यार्थ्यांना मार्गदर्शन करण्यासाठी सर्व उपाययोजना कराव्यात. तसेच याबाबत एकही विद्यार्थी परीक्षा विभागात पाठवू नये. दिलेल्या कालावधीत परीक्षा अर्ज जमा न करणे, विद्यार्थ्यांपर्यंत माहिती न पोहोचवणे, यामुळे विद्यार्थी परीक्षेपासून वंचित राहू शकतो, याची सर्वस्वी जबाबदारी संबंधित महाविद्यालय व संस्था यांची असेल. परीक्षा विभागाने घेतलेल्या निर्णयानुसार सत्र पूर्तते अंतर्गत एकही पात्र विद्यार्थी परीक्षेपासून वंचित राहणार नाही, याची सर्वतोपरी काळजी संबंधित महाविद्यालय व संस्थेने घ्यावी, असे आवाहन सावित्रीबाई फुले पुणे विद्यापीठाच्या परीक्षा व मूल्यमापन मंडळाचे संचालक डॉ. महेश काकडे यांनी केले आहे.
कोणत्या विद्यार्थ्यांना मिळणार सत्र पुर्ततता निर्णयाचा लाभ
* प्रथम वर्षातील प्रवेश 2017- 18 या शैक्षणिक वर्षातील असलेल्या पाच वर्ष अभ्यासक्रमाच्या विद्यार्थ्यांना या निर्णयाचा लाभ होणार आहे. त्यात बी.ए. एल.एल.बी., बॅचलर ऑफ आर्किटेक्चर आदी अभ्यासक्रमाचा समावेश आहे.
* प्रथम वर्षातील प्रवेश 2018-19 या शैक्षणिक वर्षातील असलेल्या चार वर्षाच्या सर्व अभ्यासक्रमाच्या विद्यार्थ्यांना या निर्णयाचा लाभ होणार आहे. त्यात बॅचलर ऑफ इंजीनियरिंग, बीएचएमसीटी आदी अभ्यासक्रमाचा समावेश आहे.
* प्रथम वर्षातील प्रवेश 2019 -20 या शैक्षणिक वर्षात असलेल्या तीन वर्षाच्या सर्व अभ्यासक्रमाच्या विद्यार्थ्यांना या निर्णयाचा लाभ होईल. त्यात बीए बी कॉम बीएससी आधी अभ्यासक्रमाच्या विद्यार्थ्यांचा समावेश आहे.
* प्रथम वर्षातील प्रवेश 2020- 21 या शैक्षणिक वर्षात असलेल्या दोन वर्षाच्या अभ्यासक्रमास प्रवेश घेतलेल्या सर्व विद्यार्थ्यांना या निर्णयाचा लाभ होईल. त्यात एमए, एम कॉम, एमएस्सी ,एमबीए आदी अभ्यासक्रमाचा समावेश आहे.
* प्रथम वर्षातील प्रवेश 2021- 22 या शैक्षणिक वर्षातील असलेल्या एक वर्ष अभ्यासक्रमाच्या सर्व डिप्लोमा धारक विद्यार्थ्यांना या निर्णयाचा लाभ होणार आहे.
