' व्हॉइस ऑफ देवेंद्र' वक्तृत्व स्पर्धेला विरोध; विद्यापीठ प्रशासन झुकले
स्पर्धा महाराष्ट्रातील १४ ते २५ वयोगटातील युवक व युवतींसाठी खुली असून स्पर्धेचा मुख्य विषय ' विकसित महाराष्ट्र' हा आहे. तसेच स्पर्धा विविध टप्प्यात विभागलेली आहे.विविध महाविद्यालयातील सर्व राष्ट्रीय सेवा योजना स्वयंसेवकांना या स्पर्धेबाबतची माहिती देऊन जास्तीत जास्त प्रमाणात या स्पर्धेत सहभागी होण्याबाबत सूचित करावे, असे पत्रक विद्यापीठाच्या राष्ट्रीय सेवा योजना विभागातर्फे प्रसिद्ध करण्यात आले होते.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या राष्ट्रीय सेवा योजना विभागातर्फे आयोजित करण्यात आलेल्या ' व्हॉइस ऑफ देवेंद्र' या राज्यस्तरीय वक्तृत्व स्पर्धेत विविध राजकीय पक्ष व विद्यार्थी संघटनांकडून विरोध करण्यात आला. त्यानंतर विद्यापीठाने या संदर्भातील परिपत्रक मागे घेतले.
' व्हाईस ऑफ देवेंद्र' ही राज्यस्तरीय वक्तृत्व स्पर्धा महाराष्ट्राचे मुख्यमंत्री देवेंद्र फडणवीस यांच्या प्रेरणेतून आयोजित केले जात आहे.ही स्पर्धा युवकांना ' विकसित महाराष्ट्र' या दृष्टिकोनाशी जोडणारी आणि त्यांच्या नेतृत्व व वक्तृत्व कौशल्यांना विकसित करणारे एक सशक्त व्यासपीठ आहे.ही स्पर्धा महाराष्ट्रातील १४ ते २५ वयोगटातील युवक व युवतींसाठी खुली असून स्पर्धेचा मुख्य विषय ' विकसित महाराष्ट्र' हा आहे. तसेच स्पर्धा विविध टप्प्यात विभागलेली आहे.विविध महाविद्यालयातील सर्व राष्ट्रीय सेवा योजना स्वयंसेवकांना या स्पर्धेबाबतची माहिती देऊन जास्तीत जास्त प्रमाणात या स्पर्धेत सहभागी होण्याबाबत सूचित करावे, असे पत्रक विद्यापीठाच्या राष्ट्रीय सेवा योजना विभागातर्फे प्रसिद्ध करण्यात आले होते. मंगळवारी एनएसयुआय व विद्यापीठ विद्यार्थी संघर्ष कृती समितीतर्फे या विरोधात आंदोलन करण्यात आले. दरम्यान विविध राजकीय पक्ष व संघटनांकडून या स्पर्धेत विरोध दर्शविण्यात आला. त्यानंतर विद्यापीठ प्रशासनाने यासंदर्भातील परिपत्रक मागे घेतले.
------------------------
विद्यापीठाने राजकीय अजेंड्याचा भाग व्हायचे नसते याचाच कदाचित विद्यापीठ प्रशासनाला विसर पडलेला दिसतो. निवडणूक आयोग भाजपच्या एखाद्या डिपार्टमेंटप्रमाणे काम करत असल्याचे संपूर्ण देश बघत आहे, आता शिक्षणाची मंदिरे असलेली विद्यापीठे देखील त्याच पंक्तीत बसणार असतील तर विश्वास तरी कुणावर ठेवायचा? विद्यापीठांनी राजकीय व्यक्तिपूजेपेक्षा शैक्षणिक गुणवत्ता सुधारण्यासाठी तसेच Voice of Democracy मजबूत करण्यासाठी प्रयत्न केले तर अधिक योग्य राहील.
रोहित पवार, आमदार व अधिसभा सदस्य
--------------------------
अभाविपच्या कार्यकर्त्याशी संबंधित संस्थेने देवेंद्र फडणवीस यांच्या वाढदिवसानिमित्त आयोजित केलेली, फडणवीस यांचा उदोउदो करणारी ' वक्तृत्व स्पर्धा ' Voice of Devendra आणि NSS च्या विद्यार्थ्यांनी त्याचा प्रचार प्रसार करून सहभाग नोंदवावा, असा व्यक्तिपूजक, राजकीय प्रचाराचा आदेश सावित्रीबाई फुले पुणे विद्यापीठ राष्ट्रीय सेवा योजना संचालक काढतात. हे शिक्षण क्षेत्रातील लोकांना अचंबित करणारेच आहे. ज्ञानमंदिरात हे होणे अत्यंत अनैतिक, धोकादायक, चुकीचा पायंडा पाडणारे आहे.
- मुकुंद किर्दत, आम आदमी पार्टी
