NSUI तर्फे सावित्रीबाई फुले पुणे विद्यापीठाच्या परीक्षा विभागासमोर आंदोलन

एज्युवार्ता न्यूज नेटवर्क

अभियांत्रिकीच्या प्रथम वर्ष व चतुर्थ वर्षाच्या विद्यार्थ्यांसाठी तात्काळ फोटो कॉपीसाठी लिंक उपलब्ध करून देण्यात यावी.- N+2+1 नियमाच्या बाहेर राहिलेल्या सर्व विद्यार्थ्यांना बॅकलॉग परीक्षा देण्याची सरसकट संधी देण्यात यावी. ए.टी.के.टी. (ATKT) संदर्भातील प्रलंबित प्रश्न तातडीने मार्गी लावावेत. ज्या विद्यार्थ्यांना हॉल तिकीट मिळाले असूनही त्यांच्या परीक्षेचे वेळापत्रक मिळालेले नाही, त्याबाबत स्पष्ट माहिती तात्काळ जाहीर करण्यात यावी, या प्रमुख मागण्यांसाठी  नॅशनल स्टुडंट्स युनियन ऑफ इंडिया (NSUI) तर्फे सावित्रीबाई फुले पुणे विद्यापीठात आंदोलन करण्यात आले. 

सावित्रीबाई फुले पुणे विद्यापीठाच्या परीक्षा विभागातील विविध विद्यार्थ्यांच्या समस्यांबाबत NSUI तर्फे प्रभारी संचालक डॉ. प्रभाकर देसाई यांना निवेदन देण्यात आले. विद्यार्थ्यांच्या शैक्षणिक भविष्याशी संबंधित गंभीर प्रश्न तात्काळ सोडवावेत, अशी मागणी NSUI ने केली आहे. NSUI महाराष्ट्र प्रदेश मीडिया विभागाचे चेअरमन महेश अनिल कांबळे यांनी दिलेल्या निवेदनात म्हटले आहे की, विद्यापीठातील अनेक विद्यार्थ्यांना परीक्षा प्रक्रियेतील त्रुटी व तांत्रिक अडचणींमुळे मोठा त्रास सहन करावा लागत आहे. यामुळे विद्यार्थ्यांचे शैक्षणिक नुकसान होत असून परीक्षा विभागाने तातडीने योग्य निर्णय घेऊन विद्यार्थ्यांना दिलासा द्यावा.

या आंदोलनामुळे विद्यार्थ्यांच्या प्रश्नांकडे प्रशासनाचे लक्ष वेधले गेले असून NSUI च्या आंदोलनाला यश मिळाल्याचे पदाधिकाऱ्यांनी सांगितले. या वेळी मीडिया चेअरमन महेश कांबळे, प्रदेश उपाध्यक्ष अक्षय कांबळे, प्रदेश सचिव प्रसन्न मोरे, तेजस बनसोडे यांच्यासह NSUI चे अनेक कार्यकर्ते आणि मोठ्या संख्येने विद्यार्थी उपस्थित होते.