NEET 2026 पुनर्परीक्षा: प्रश्न पत्रिकांच्या सुरक्षेसाठी लष्कराची मदत घेण्याची तयारी

एज्युवार्ता न्यूज नेटवर्क 

नीट यूजी २०२६ (NEET UG 2026) परीक्षेच्या पेपर लीक प्रकरणामुळे (paper leak case) रद्द झालेल्या परीक्षेची पुनर्परीक्षा २१ जूनला (Exam on June 21st) घेण्याच्या पार्श्वभूमीवर केंद्र सरकारने भारतीय लष्कराची (Indian Army) मदत घेण्याचा महत्त्वाचा प्रस्ताव चर्चेला घेतला आहे. संरक्षण मंत्री राजनाथ सिंह यांच्या निवासस्थानी नुकतीच एक उच्चस्तरीय बैठक झाली. ज्यामध्ये शिक्षण मंत्री धमेंद्र प्रधान, (Dhamendra Pradhan) NTA अधिकारी, PMO प्रतिनिधी आणि इतर वरिष्ठ अधिकारी सहभागी होते.

या बैठकीत पेपर छपाई, वाहतूक, साठवणूक आणि परीक्षा केंद्रांवरील सुरक्षेसाठी लष्कराच्या अत्याधुनिक गोपनीय पद्धती, GPS ट्रॅकिंगच्या पलीकडील कठोर उपाय आणि संभाव्य एअर ट्रान्सपोर्टचा वापर करण्याबाबत चर्चा झाली. पुर्वीच्या परीक्षेचा पेपर लीक झाल्याने सीबीआयच्या तपासात आतापर्यंत १३ जणांना अटक झाली आहे. या पार्श्वभूमीवर सरकार ‘फुलप्रूफ’ सुरक्षा व्यवस्था सुनिश्चित करण्यासाठी लष्करी मदतीचा विचार करत आहे.

धमेंद्र प्रधान यांनी यापूर्वीही सुरक्षा एजन्सींसोबत बैठक घेऊन कडक प्रोटोकॉल, बायोमेट्रिक व्हेरिफिकेशन, डिजिटल मॉनिटरिंग आणि राज्य सरकारांच्या सहकार्याचे निर्देश दिले आहेत. देशभरातील ५ हजार ४०० हून अधिक केंद्रांवर परीक्षा घेण्याची तयारी सुरू आहे. विद्यार्थ्यांमध्ये विश्वास निर्माण करण्यासाठी हा निर्णय घेतला जात असल्याचे सांगण्यात आले आहे.

मात्र, लष्कराची भूमिका कितपत असेल याबाबत अद्याप अधिकृत घोषणा झालेली नाही. NTA लवकरच नवीन अॅडमिट कार्ड आणि मार्गदर्शक तत्त्वे जारी करणार आहे. ही बातमी विद्यार्थ्यांसाठी दिलासादायक मानली जात आहे, तर काहींनी याला ‘अतिरेक’ म्हटले आहे. परीक्षार्थींनी केवळ अधिकृत NTA वेबसाइटवरून अधिकृत माहितींवर विश्वास ठेवावा. तसेच अफवांपासून दूर राहावे, असे आवाहन करण्यात आले आहे.