MPSC : ई केवायसी प्रक्रिया सुरू; ओळख पडताळणी बंधनकारक

एज्युवार्ता न्यूज नेटवर्क

महाराष्ट्र लोकसेवा आयोगाने (MPSC) अर्ज प्रक्रियेत पारदर्शकता आणण्यासाठी महत्त्वाची ठरणारी ई-केवायसी प्रक्रिया सुरू (E-KYC process start) झाली आहे. आयोगाने यासंदर्भात प्रसिद्धीपत्रक जाहीर (Press release issued) करत याबाबत माहिती दिली आहे. त्यामुळे आता कोणत्याही भरती प्रक्रियेसाठी अर्ज करण्यापूर्वी उमेदवाराने आपली ओळख पडताळणी पूर्ण करणे अनिवार्य असणार आहे. अन्यथा, उमेदवाराचा अर्ज स्वीकारता जाणार नाही, असे आयोगाकडून स्पष्ट करण्यात आले आहे.

आयोगाच्या प्रसिद्धीपत्रकानुसार, अर्ज स्वीकारण्यासाठी ई-केवायसी प्रक्रिया पूर्ण केलेली असणे बंधनकारक आहे. ही केवायसी प्रक्रिया एकदाच पूर्ण करावी लागणार असून, उमेदवाराचे एकच प्रोफाइल सक्रिय राहिल तर अन्य खाती निष्क्रिय मानली जातील त्यामुळे स्पर्धा परीक्षांमध्ये होणाऱ्या गैरप्रकारांना आळा बसेल आणि पात्र तमेदवारांना योग्य संधी मिळेल, असा विश्वास व्यक्त केला जात आहे. उमेदवारांनी वेळेवर ही प्रक्रिया पूर्ण करून परीक्षेच्या तयारीमध्ये कोणताही अडथळा येणार नाही, याची काळजी घ्यावी, असे आवाहन आयोगाने केले आहे.

अनेक विद्यार्थी आणि स्पर्धा परीक्षा मार्गद‌र्शकांनी आयोगाच्या या निर्णयाचे स्वागत केले आहे. या नवीन नियमानुसार, प्रत्येक उमेदवाराला आयोगाच्या अधिकृत संकेतस्थळावर वन टाइम रजिस्ट्रेशन (ओटीआर) करून आधार क्रमांक, मोबाईल क्रमांक आणि इतर ओळखपत्राच्या आधारे केवायसी करावी लागणार आहे. केवायसी करण्यासाठी वापरला जाणारा मोबाईल क्रमांक हा आधार क्रमांकाशी जोडलेला असणे आवश्यक आहे, अन्यथा ओटीपी' न मिळाल्यास ही प्रक्रिया पूर्ण होऊ शकणार नाही, असेही आयोगाने स्पष्ट केले आहे.

अशी करा ई-केवायसी -

सर्वप्रथम आयोगाचे अधिकृच संकेतस्थळ https://mpsc.gov.in/home ला भेट द्या. वन टाइम रजिस्ट्रेशन (ओटीआर) पूर्ण करा. प्रोफाइलमध्ये किंवा अर्ज करण्याच्या टप्प्यावर ई केवायसी पर्यायावर आधार क्रमांक, मोबाईल क्रमांक आणि इतर आवश्यक ओळखपत्रांची माहिती भरा. मोबाईल नंबरची पडताळणी करा. दिलेल्या सूचनांनुसार ऑनलाइन किंवा ऑफलाइन पर्याय निवडून ई-केवायसी प्रक्रिया पूर्ण करा.