केंद्र प्रमुख व पर्यवेक्षकांची अदलाबदली; शिक्षण विभागाने शाळांची यादीच केली प्रसिद्ध

एज्युवार्ता न्यूज नेटवर्क 

महाराष्ट्र राज्य माध्यमिक व उच्च माध्यमिक शिक्षण मंडळातर्फे (Maharashtra State Board of Secondary and Higher Secondary Education) घेण्यात येणाऱ्या दहावी, बारावीच्या परीक्षा (10th and 12th standard exams) परीक्षा काॅपीमुक्त करण्याच्या उद्देशाने परीक्षा केंद्रातील केंद्र प्रमुख, पर्यवेक्षक अदलाबदली करण्याचा निर्णय मागे घेण्यात आला. मात्र, २०१८ ते २०२४ या कालावधीत ज्या केंद्रांवर कॉपीची प्रकरणे आढळली, फक्त त्याच केंद्रांवरील पर्यवेक्षक व केंद्र संचालक बदलण्याचा निर्णय शिक्षण विभागाने घेतला आहे. त्या उद्देशाने पुणे जिल्हा परिषद माध्यमिक शिक्षणाधिकारी डाॅ. भाऊसाहेब कारेकर (Pune Zilla Parishad Secondary Education Officer Dr. Bhausaheb Karekar) यांच्या कार्यालयाकडून २०१८ ते २०२४ या कालावधीत काॅपीचे प्रकरणे आढळलेल्या शाळांची यादी प्रसिद्ध (List of schools where copying cases were found published) करण्यात आली आहे. 

इयत्ता १० वी व १२ वी फेब्रुवारी/मार्च २०२५ मध्ये आयोजित परीक्षा पारदर्शक व कॉपीमुक्त घेण्याच्या उद्देशाने आवश्यक त्या सर्व उपाययोजना परीक्षा केंद्रावर करण्यात येत आहेत. २०१८ ते २०२४ या कालावधीत ज्या परीक्षा केंद्रावर काॅपीची प्रकरणे आढळले आहेत. त्या परीक्षा केंद्रांची यादी प्रसिद्ध करण्यात आली आहे. या परीक्षा केंद्रावर दहावी, बारावी परीक्षेच्या वेळी केंद्रसंचालक, पर्यवेक्षक व इतर कर्मचारी वर्ग यांची नियुक्ती सदर केद्रांस संलग्न करण्यात आलेल्या शाळा/कनिष्ठ महाविदयालय या व्यतिरिक्त इतर शाळा / कनिष्ठ महाविदयालयामधून करण्यात यावी. याबाबत कोणताही हलगर्जीपणा होणार नाही याची दक्ष घ्यावी, असे कारेकर यांनी गटशिक्षणाधिकारी यांना लिहिलेल्या पत्रात म्हटले आहे. 

दहावी - बारावी परीक्षा कॉपीमुक्त करण्याच्या उद्देशाने परीक्षा केंद्रातील केंद्र प्रमुख, पर्यवेक्षक अदलाबदल करण्याचा निर्णय घेण्यात आला होता. मात्र, हा निर्णय रद्द करावा अन्यथा परीक्षा प्रक्रिया व पेपर तपासणीवर बहिष्कार घालण्यात येईल, असा इशारा शिक्षक संघटना व शिक्षक आमदारांनी दिल्यानंतर प्रशासनाने नरमले असून या  निर्णयामध्ये बदल करण्यात आले आहेत. त्यानुसार आता २०१८ ते २०२४ या कालावधीत ज्या केंद्रांवर कॉपीची प्रकरणे आढळली, फक्त त्याच केंद्रांवरील पर्यवेक्षक व केंद्र संचालक बदलण्याचा निर्णय शिक्षण विभागाने घेतला आहे. 

कोरोना काळातील २०२१-२२ या दोन परीक्षा वगळून मागील ५ वर्षाच्या म्हणजेच फेब्रुवारी-मार्च २०१८, २०१९, २०२०, २०२३ व २०२४ या परीक्षांमध्ये ज्या परीक्षा केंद्रांवर गैरमार्गाची प्रकरणे आढळून आलेली आहेत. अशा परीक्षा केंद्रावर केंद्रसंचालक, पर्यवेक्षक व परीक्षेशीसंबंधित व्यक्तींची नियुक्ती संबंधित केंद्रावर समाविष्ट असणाऱ्या शाळेतील शिक्षक व अन्य कर्मचाऱ्यांव्यतिरिक्त इतर अन्य शाळा/ उच्च माध्यमिक विद्यालयातील शिक्षक व कर्मचाऱ्यांमधून करण्यात येणार असल्याचे मंडळाने जाहीर केले आहे.