टाटा इन्स्टिट्यूटमध्ये पी.एचडी. करणे झाले सोपे; या उमेदवारांना संधी

एज्युवार्ता न्यूज नेटवर्क

टाटा इन्स्टिट्यूट ऑफ सोशल सायन्सेस (TISS) मोठा निर्णय घेतला आहे. नोकरी, व्यवसायामुळे शिक्षण अर्ध्यावर सोडणाऱ्या होतकरू तरुणांसाठी संशोधन (पीएचडी) करण्याची संधी (Opportunity to do a PhD) देण्यात येणार आहे. संस्थेने 'एग्झिक्युटिव्ह पीएचडी प्रोग्राम' सुरू (Executive PhD Program launched) करण्याची घोषणा केली असून, समाजशास्त्राच्या पारंपरिक विद्यापीठांत हा पहिलाच उपक्रम ठरणार आहे. नोकरी किंवा व्यवसाय करत असताना संशोधन व शिक्षण पूर्ण करण्याची संधी उमेदवारांना मिळणार आहे.

MBBS, BDS साठी प्रवेश फेरी सुरू; १५ ऑक्टोबरला निवड यादी

एग्झिक्युटिव्ह पीएचडी ही नियमित डॉक्टरेट पदवी इतकीच दर्जेदार असेल. पदव्युत्तर शिक्षण पूर्ण केलेले उमेदवार यात प्रवेश घेऊ शकतील. उमेदवारांना अभ्यासक्रम पूर्ण करण्यासाठी सहा वर्षांची मुदत असेल आणि आपल्या सोयीने त्यांना अभ्यासक्रम पूर्ण करता येईल. यात लवचिकता हीच मोठी जमेची बाजू आहे. या अभ्यासक्रमाला शैक्षणिक परिषदेने मंजूरी दिली असून, अंतिम मान्यता कार्यकारी परिषदेची राहिली आहे. नियोजनानुसार हा नवा अभ्यासक्रम २०२६-२७ या शैक्षणिक वर्षापासून सुरू होण्याची शक्यता आहे.

यामुळे व्यावसायिकांना त्यांच्या कामात खंड न पडता शैक्षणिक प्रवास सुरू ठेवण्याची संधी मिळेल. संशोधनात व्यावसायिक अनुभव जोडला गेला, तर ज्ञान प्रक्रियेची गुणवत्ता वाढेल. यासाठीच एग्झिक्युटिव्ह पीएचडी ही नवी योजना राबवली जात आहे. पदवी अभ्यासक्रमांमध्येही 'टीआयएसएस'ने बदलांचा मार्ग अवलंबला आहे. नवे शैक्षणिक धोरण (एनईपी) लक्षात घेऊन पदवी अभ्यासक्रम रचले जात आहेत. या अभ्यासक्रमांमुळे विद्यार्थ्यांना अधिक पर्याय व संधी उपलब्ध होतील, असे 'टीआयएसएस'कडून सांगण्यात आले आहे.