विद्यार्थ्यांकडून डोनेशन घेऊन प्रवेश देणाऱ्या सिम्बायोसिस विद्यापीठाची चौकशी करा; युवासेनेची मागणी

एज्युवार्ता न्यूज नेटवर्क

संविधानाने दिलेल्या शैक्षणिक आरक्षणाला डावलून विविघ अभ्यासक्रमांच्या प्रवेश प्रक्रिया राबवणाऱ्या, तसेच विद्यार्थ्यांकडून डोनेशन घेऊन प्रवेश करणाऱ्या सिम्बायोसिस आंतरराष्ट्रीय अभिमत विद्यापीठाची (Symbiosis International University) स्वतंत्र समितीद्वारे चौकशी करावी, अशी मागणी युवासेनेचे सहसचिव कल्पेश यादव यांनी विद्यापीठ अनुदान आयोगाचे (UGC) अध्यक्ष प्रा. विनीत जोशी (UGC President Prof. Vineet Joshi) यांच्याकडे केली आहे. सिम्बायोसिस विद्यापीठ प्रशासनाकडून आम्ही डोनेशन घेऊन विद्यार्थ्यांना प्रवेश देत नाही, असा दरवर्षी दावा करण्यात येतो. मात्र, नियमित शुल्काच्या दुप्पट शुल्क आकारून धनाढ्य पालकांच्या मुला-मुलींना प्रवेश दिले जातात, असे कल्पेश यादव (Kalpesh Yadav) यांनी म्हटले आहे. 

विद्यापीठाशी संबंधित सेवा ‘आपले सरकार’ पोर्टलवर उपलब्ध; २० लाख विद्यार्थ्यांना होणार फायदा

विद्यापाठाकडून संपूर्ण प्रवेश प्रक्रियेमध्ये विद्यार्थ्यांकडून अर्ज भरण्यापासून ते प्रवेश प्रक्रियेत सहभागी होण्यापर्यंत पाच ते दहा हजार रुपये आकारण्यात येतात. या विद्यापीठाकडून प्रवेशासाठी ' स्नॅप ' नावाची प्रवेश परीक्षा घेण्यात येते. या परीक्षेसाठी ऑनलाईन पद्धतीने २ हजार रुपये शुल्क करण्यात येते. विद्यार्थ्यांनी प्रवेश परीक्षा दिल्यानंतर, प्रवेशासाठी त्यांना प्रवेश प्रक्रियेत सहभागी व्हावे लागते. एकदा शुल्क भरल्यानंतर ही संपूर्ण प्रक्रिया मोफत होणे गरजेचे आहे.

मात्र, या प्रवेश प्रक्रियेत सहभागी होण्यासाठी आणि अभ्यासक्रमाला प्रवेश अर्ज करण्यासाठी आणखी वेगळी रक्कम आकारण्यात येते. त्याचप्रमाणे विद्यार्थ्यांकडून विविध शैक्षणिक संकुलन प्रवेशासाठी अर्ज करण्यासाठी प्रत्येकी ५०० ते एक हजार रुपये रक्कम आकारण्यात येते. या संपूर्ण प्रकारामुळे विद्यार्थ्याला ५ ते १० हजार रुपयांचा आर्थिक भुर्दंड सहन करावा लागतो. या प्रवेश प्रक्रियेत दरवर्षी काही हजार विद्यार्थी सहभागी होतात. त्यातून विद्यापीठाला कोट्यवधी रुपये मिळतात. त्यामुळे ही प्रवेश प्रक्रिया नसून पैसे कमवण्याचा आणि त्यातून नफेखोरी करण्याचा वाईट धंदा विद्यापीठाने सुरू असल्याचे कल्पेश यादव यांनी निवेदनात नमूद केले आहे.

सिम्बायोसिस आंतरराष्ट्रीय अभिमत विद्यापीठाकडून प्रवेश परीक्षा घेतल्यानंतर त्यात विद्यार्थ्यांना मिळालेल्या गुणांच्या याद्या विद्यार्थी पालकांच्या माहितीसाठी सार्वजनिक स्वरूपात जाहीर करण्यात येत नाही किंवा कोणत्याही फलकावर, विद्यापीठाच्या वेबसाईटवर जाहीर होत नाही प्रत्येक विद्यार्थ्याला अत्यंत गोपनीय पद्धतीने ईमेलद्वारे त्यांचे गुण कळविण्यात येतात आणि त्याआधारे त्यांना प्रवेश प्रक्रियेची माहिती आणि प्रवेश शुल्काची माहिती देण्यात येते. त्यामुळे प्रवेश परीक्षा किती विद्यार्थ्यांनी दिली, गुणवत्ता यादीत किती विद्यार्थी होते, विद्यार्थिनिहाय किती गुण मिळाले, प्रवेशासाठी कट ऑफ गुण काय आहेत अशा अशा कोणत्याच विषयांची माहिती मिळत नाही. त्यामुळे विद्यार्थ्यांनी पालकांना प्रवेश प्रक्रिये बाबत कोणतीही माहिती मिळत नसून ते त्यांच्या हक्कांपासून वंचित होत आहेत. ही संपूर्ण प्रवेश प्रक्रिया भ्रष्ट आणि पैसे कमवण्याचे उद्देशाने राबविण्यात येत असल्याचे कल्पेश यादव म्हणाले.

या आहेत युवासेनेच्या प्रमुख मागण्या -

सिम्बायोसिस आंतरराष्ट्रीय अभिमत विद्यापीठाच्या गेल्या पाच वर्षाच्या संपूर्ण प्रवेश प्रक्रियेची स्वतंत्र समिती स्थापन करून, चौकशी करण्यात यावी. संपूर्ण प्रकरण मोठ्या प्रमाणावर आर्थिक गैरववार झाला असून हा कोट्यावधींच्या घरात आहे त्यामुळे याची चौकशी होणे गरजेचे आहे. सिम्बायोसिस आंतरराष्ट्रीय अभिमत विद्यापीठाने शैक्षणिक अरक्षणानुसर गेल्या पाच वर्षात किती मागासवर्गीय; तसेच राखीव विद्यार्थ्यांना प्रवेश दिला, याबाबतची माहिती सार्वजनिक स्वरुपात उपलब्ध होण्यासाठी विद्यापीठाने जाहीर करण्याबाबत आदेश द्यावे. सिम्बायोसिस आंतरराष्ट्रीय अभिमत विद्यापीठाने स्नॅप प्रवेश परीक्षा आणि या प्रवेश परीक्षेची संबंधित विद्यार्थ्यांची उपस्थिती, विद्यार्थ्यांच्या गुणवत्ता याद्या, कट ऑफ गुण, प्रवेश घेणाऱ्या विद्यार्थ्यांची माहिती लोकांच्या माहितीसाठी विद्यापीठाच्या वेबसाईटवर किंवा शैक्षणिक संकुलातील फलकांवर प्रसिद्ध कराव्यात.