उच्च आणि तंत्रशिक्षण मंत्र्यांना शिक्षकांनी ठेवले तासभर वेटिंगवर..

एज्युवार्ता न्यूज नेटवर्क

माजी मंत्री दिलीप वळसे पाटील (Dilip Walse Patil) यांनी पालक म्हणून एका नामांकित इंग्रजी माध्यमाच्या शाळेत गेल्यानंतर आलेला अनुभव सांगितला. 'तुम्ही उच्च व तंत्रशिक्षण मंत्री (Minister of Higher and Technical Education) आहात हे कोणाला सांगू नका, लाल दिव्याची गाडी आणि पोलिसांचा ताफा अजिबात आणू नका,' असे मुलीने मला स्पष्टपणे बजावले. त्यानुसार मी सामान्य पालकांप्रमाणे गेलो तर मी मंत्री असताना शाळेतील शिक्षकांनी (School teacher) मला तब्बल एक तास वेटिंगवर ठेवल्याचा प्रसंग माजी मंत्री दिलीप वळसे पाटील यांनी सांगितला.

आंबेगाव तालुक्यातील निरगुडसर येथील पंडित जवाहरलाल नेहरू विद्यालयात आयोजित एका कार्यक्रमात बोलताना माजी मंत्री दिलीप वळसे पाटील यांनी मंत्री असताना घडलेला हा किस्सा सांगितला. मुंबईतील एका नामांकित शाळेत पालक म्हणून आलेला अनुभवही वळसे पाटील यांनी या वेळी सांगितला. मी राज्याचा उच्च व तंत्रशिक्षण मंत्री होतो. मुंबईतील एका नामांकित इंग्रजी माध्यमाच्या शाळेत माझी कन्या पूर्वा वळसे पाटील ही शिकत होती. इंग्रजी माध्यमांच्या शाळांमध्ये नियमितपणे पालक बैठक होत असतात. मंत्री असलो तरी वेळ काढून मला स्वत:लाच बैठकीसाठी जावे लागले, असे वळसे पाटील यांनी सांगितले.

बैठकीला येण्यापूर्वी मुलगी पूर्वा हिने मला स्पष्टपणे सांगितले होते की, तुम्ही उच्च व तंत्र शिक्षण मंत्री आहात, हे कोणालाही सांगू नका. पालकांच्या बैठकीला येताना लाल दिव्याची गाडी किंवा बंदोबस्तासाठी असलेला पोलिसांचा ताफा अजिबात सोबत आणून नका. मुलीने सांगितल्यामुळे मी तिचे ऐकले आणि एक सर्वसामान्य पालकाप्रमाणे मी बैठकीला गेलो, त्यावेळी शाळेतील शिक्षकांनी मला तब्बल एक तास वेटिंगवर ठेवले, असा माजी मंत्री दिलीप वळसे पाटील यांनी किस्सा सांगितला.