ITI Admission: आयटीआय प्रवेशासाठी मुदतवाढ

एज्युवार्ता न्यूज नेटवर्क

अनेक विद्यार्थ्यांची आयटीआयमध्ये (ITI Admission) प्रवेश घेण्याची इच्छा असते त्यांच्यासाठी आनंदाची बातमी आहे. व्यवसाय शिक्षण व प्रशिक्षण संचालनालयामार्फत (Directorate of Vocational Education and Training) आयटीआय प्रवेशासाठी आता २७ जूनपर्यंत मुदतवाढ (date Extension) देण्यात आली आहे.

सदर प्रवेश प्रक्रिया ऑनलाइन पद्धतीने १५ मे २०२५ पासून राबवण्यात येत असून प्रवेश अर्ज करणे, प्रवेश अर्ज निश्चित करणे आणि पहिल्या प्रवेश फेरीसाठी व्यवसाय व संस्थानिहाय विकल्प व प्राधान्य सादर करणे ही सर्व प्रक्रिया उमेदवारांना २७ जूनपर्यंत करणे आवश्यक असणार आहे.  

विद्यार्थ्यांसाठी ६ जूनपासून चॅटबॉटचीही व्यवस्था सुरू करण्यात आली आहे. मात्र, मुंबई शहरातील हेल्पलाइन क्रमांक शुक्रवारी काही काळ बंद असल्याचे निदर्शनास आले आहे. चॅटबॉटद्वारे मदत करण्याबरोबरच व्यवसाय शिक्षण व प्रशिक्षण संचालनालयाने प्रत्येक विभागात मदत संपर्क क्रमांक दिले आहेत.

७८,४०६ इतके प्रवेश निश्चित

राज्यात आयटीआयसाठी एकूण विद्यार्थी नोंदणी १ लाख ३९ हजार ३२ एवढी झाली आहे तर १ लाख २७ हजार ४५७ विद्यार्थ्यांनी पूर्ण अर्ज भरले आहेत. १ लाख २५ हजार ५ विद्यार्थ्यांनी शुल्क भरणा केला आहे. तर ७८ हजार ४०६ इतके प्रवेश निश्चित झाले आहेत. पर्यायी अर्ज भरलेले विद्यार्थी ६८ हजार ५८३ इतके आहेत, अशी माहिती व्यवसाय शिक्षण व प्रशिक्षण संचालनालयाने दिली आहे.

अधिक माहितीसाठी उमेदवारांनी https://admission.dvet.gov.in/ या अधिकृत वेबसाइटला भेट द्यावी.