यंदा अभियांत्रिकी प्रवेशाच्या तीन ऐवजी चार फेऱ्या, १७ जुलै रोजी अंतिम यादी प्रसिद्ध होणार 

एज्युवार्ता न्यूज नेटवर्क 

यंदा अभियांत्रिकी प्रवेशाच्या (Engineering Admission Process) तीन ऐवजी चार फेऱ्या होणार (There will be 4 rounds instead of 3) आहेत. तसेच १७ जुलै रोजी अंतिम गुणवत्ता यादी प्रसिद्ध (Final merit list published on July 17) केली जाणार आहे. यासाठी २८ जूनपासून सुरू झाली आहे. यातील पहिला टप्पा म्हणजे रजिस्ट्रेशन आणि डॉक्युमेंट व्हेरिफिकेशन ही प्रक्रिया ८ जुलैपर्यंत चालणार असून त्यानंतर १२ जुलै रोजी पहिली तात्पूरती गुणवत्ता यादी जाहीर होणार आहे.

अभियांत्रिकी प्रवेश प्रक्रिया सुरू झाली आहे. यासाठी सीईटी सेलच्या ऑनलाइन पोर्टलवर रजिस्ट्रेशन करणे आवश्यक आहे. त्यानंतर दिलेला विकल्प निवडून ई-व्हेरिफिकेशन किंवा सीईटी सेलद्वारा मान्यता प्राप्त सुविधा केंद्रावर जावून फिजिकल डॉक्युमेंट व्हेरिफिकेशन करण्याची गरज आहे. त्यानंतर १३ ते १५ जुलै हा ग्रेव्हीअन्स पिरेड असेल. यामध्ये आपले नाव किंवा काही चुकीची माहिती नोंदविली गेली असल्यास अथवा कागदपत्र अद्ययावत करता येतील. त्यानंतर अंतिम गुणवत्ता यादी १७ जुलै रोजी जाहीर होणार आहे. विशेष म्हणजे, यंदाच्या प्रवेशप्रक्रियेसाठी तीन ऐवजी चार फेऱ्या होणार आहेत. 

बी फार्मसी प्रवेश प्रक्रिया सुरू, २१ जुलैला अंतिम गुणवत्ता यादी

पहिल्या फेरीत केंद्रीभूत प्रवेशप्रक्रिया आणि पसंती यादीनुसार जागेचे वाटप केले जाते. त्याचप्रमाणे कॅप राउंड-२, ३ आणि ४ मधील ऑप्शन फॉर्म फिलिंग व पसंती यादीनुसार जागा वाटप केल्या जातात. राउंडदरम्यान आपल्या पसंतीची शाखा आणि महाविद्यालय प्राप्त झाले असल्यास महाविद्यालयात त्या जाऊन प्रवेशप्रक्रिया पूर्ण करावी लागणार आहे.

प्रवेशासाठी यंदा चार फेऱ्या होणार आहेत. प्रथम फेरीत जर प्रथम क्रमांकाच्या विकल्पाचे महाविद्यालय आणि शाखा प्राप्त झाली तर तिथे प्रवेश घेणे बंधनकारक आहे. प्रवेश न घेतल्यास विद्यार्थी केंद्रीभूत प्रवेशप्रक्रियेच्या पुढील फेरीसाठी पात्र राहणार नाही. याबरोबरच ज्या विद्यार्थ्यांना दिलेल्या पसंती क्रमांकापैकी पहिल्या क्रमांकाच्या विकल्पाव्यतिरिक्त कोणताही विकल्प अलॉट झाला असेल, तर त्यांना 'नॉट फ्रिज' करून म्हणजेच अलॉट झालेला विकल्प तात्पुरता स्वीकारून सीट अॅक्सेप्टन्स फिस भरून दुसऱ्या फेरीत जाता येईल.

दुसऱ्या फेरीमध्ये जर प्रथम तीन विकल्पांमधील शाखा आणि महाविद्यालय प्राप्त झाले तर प्रवेश घेणे बंधनकारक राहील. अन्यथा तो विद्यार्थी प्रवेश प्रक्रियेच्या पुढील फेरीस पात्र राहणार नाही. तसेच ज्या विद्यार्थ्यांना दिलेल्या पसंती क्रमांकापैकी पहिल्या तीन क्रमांकाच्या विकल्पा व्यतिरिक्त कोणताही विकल्प अलॉट झाला असेल त्यांना 'नॉट फ्रिज' करून म्हणजेच अलॉट झालेला विकल्प तात्पुरता स्वीकारून तिसऱ्या फेरीत जाता येईल.

तिसऱ्या फेरीत प्रथम सहा विकल्पांपैकी कोणतीही शाखा प्राप्त झाल्यास प्रवेश घेणे बंधनकारक राहील. तसेच ज्या विद्यार्थ्यांना दिलेल्या पसंती क्रमांकापैकी पहिल्या सहा क्रमांकाच्या विकल्पाव्यतिरिक्त कोणताही विकल्प अलॉट झाला असेल तर त्यांना 'नॉट फ्रिज' करून अलॉट झालेला विकल्प तात्पुरता स्वीकारून चौथ्या फेरीमध्ये जाता येईल. या चौथ्या फेरीत जे महाविद्यालय आणि शाखा प्राप्त आहे, त्यामध्ये प्रवेश घेतो आश्यक आहे.