RTE प्रवेश अर्जासाठी मुदतवाढ, पालकांना 'या' तारखेपर्यंत भरता येणार अर्ज
राज्यभरात आतापर्यंत एकूण २ लाख ६७ हजार १३४ अर्ज दाखल झाले आहेत. त्यापैकी सर्वाधिक ५० हजार ८९३ अर्ज पुणे जिल्ह्यातून प्राप्त झाले आहेत. यात पुणे जिल्हा आघाडीवर आहे.
eduvarta@gmail.com 
एज्युवार्त न्यूज नेटवर्क
शिक्षण हक्क कायद्यानुसार (RTE) खासगी शाळांमधील २५ टक्के राखीव प्रवेशाकरिता ऑनलाइन अर्ज (Online Application) अद्याप भरून न शकणाऱ्या पालकांसाठी महत्त्वाची अपडेट समोर आली आहे. आरटीई अर्जासाठी पूर्वी देण्यात आलेली मुदत संपुष्टात आल्यानंतर आता पुन्हा एकदा ३१ मार्चपर्यंत मुदतवाढ (Extension till March 31) देण्याचा निर्णय घेण्यात आल्याची माहिती प्राथमिकचे शिक्षण संचालक शरद गोसावी (Sharad Gosavi) यांनी परिपत्रकाद्वारे दिली आहे.
ज्या विद्यार्थ्यांनी आधी अर्ज भरले होते त्यांना अर्ज दुरुस्तीसाठी आणि जे विद्यार्थी १ किमी अंतराच्या नियमावलीमुळे आरटीईपासून वंचित राहत होते. त्यानंतर मुंबई उच्च न्यायालयाच्या नागपूर खंडपीठाच्या निर्देशानुसार शाळेच्या अंतरासंबंधीची १ किलोमीटरची अट शिथिल करुन पालकांना घरापासून ३ किमी ते ५ किमी पर्यंत अंतरातील शाळा निवडता येत असून यामुळे पालकांना शाळांचे अधिक पर्याय उपलब्ध झाले आहेत.
अशा सर्व विद्यार्थ्यांना प्रवेश प्रक्रियेसाठी अर्ज भरण्यासाठी ३१ मार्च पर्यंत मुदत वाढविण्यात आली आहे. त्यामुळे ज्या पालकांनी अद्याप आपल्या पाल्याचे आरटीई प्रवेश प्रक्रियेसाठी अर्ज भरलेले नाहीत त्यांनी लवकरात लवकर अर्ज भरावे, असे आवाहन शिक्षण विभागाकडून करण्यात आले आहे.
राज्यभरात आतापर्यंत एकूण २ लाख ६७ हजार १३४ अर्ज दाखल झाले आहेत. त्यापैकी सर्वाधिक ५० हजार ८९३ अर्ज पुणे जिल्ह्यातून प्राप्त झाले आहेत. यात पुणे जिल्हा आघाडीवर आहे. अंतिम मुदतीच्या पार्श्वभूमीवर तांत्रिक अडचणी टाळण्यासाठी अर्ज वेळेत पूर्ण करावे, असे आवाहन शिक्षण विभाग करत आहे. सदर अर्ज प्रक्रिया पूर्ण केल्यानंतर लॉटरी पद्धतीने विद्यार्थ्यांची निवड करण्यात येईल. निवडलेल्या विद्यार्थ्यांनाच संबंधित शाळांमध्ये प्रवेश दिला जाणार आहे, असेही शिक्षण विभागाकडून स्पष्ट केले जात आहे.
