सीटीईटी आणि जिल्हा परिषद निवडणुक ७ फेब्रुवारीला एकाच दिवशी, परीक्षार्थीमध्ये गोंधळ 

एज्युवार्ता न्यूज नेटवर्क 

केंद्रीय शिक्षक पात्रता परीक्षा (CTET) आणि राज्यातील १२ जिल्हा परिषद आणि १२५ पंचायत समितीच्या (District Council and Panchayat Samiti elections) सार्वत्रिक निवडणुका एकाच दिवशी (CTET exam and the election same day) ७ फेब्रुवारी रोजी आल्याने सीटीईटी परीक्षा (CTET Exam 2026) देणाऱ्या परीक्षार्थींमध्ये गोंधळाची परिस्थिती आहे. निवडणूक कार्यक्रम पार पाडण्यासाठी प्राथमिक, माध्यमिक व उच्च माध्यमिक सर्व व्यवस्थापनांच्या शाळांमधील शिक्षकांना निवडणूक आदेश (Election orders for teachers) देण्यात आले आहेत. 

हेही वाचा - जेईई मुख्य सत्र २ परीक्षेसाठी अर्ज भरण्यास सुरुवात, २५ फेब्रुवारीपर्यंत मुदत

केंद्र शासनामार्फत वेळापत्रकानुसार ७ व ८ फेब्रुवारी २०२६ रोजी सीटीईटी परीक्षा संपूर्ण देशभर आयोजित करण्यात येत आहे. या परीक्षेचे वेळापत्रक यापूर्वीच जाहीर झालेले असून मोठ्या संख्येने शिक्षकांनी या परीक्षेसाठी अर्ज भरलेले आहेत. तसेच अनेक विद्यार्थीही सीटीईटी परीक्षा देणार आहेत.

एकीकडे परीक्षा देणे बंधनकारक आणि दुसरीकडे निवडणूक आदेश प्राप्त झाल्यामुळे शिक्षकांपुढे गोंधळाची परिस्थिती निर्माण झाली आहे. परीक्षा द्यावी की राष्ट्रीय कर्तव्य म्हणून निवडणूक काम पार पाडावे, या संभ्रमात शिक्षक सापडले आहेत. 

याशिवाय महाराष्ट्र राज्य माध्यमिक व उच्च माध्यमिक शिक्षण मंडळाच्या दहावी-बारावीच्या प्रात्यक्षिक परीक्षा आणि जिल्हा परिषद पंचायत समितीचे कर्तव्य एकाच वेळी आल्याने देखील शिक्षक व शिक्षकेत्तर कर्मचाऱ्यांमध्ये मोठा पेच निर्माण झाला आहे. दोन्ही कर्तव्य अत्यावश्यक सेवेत येत असल्याने नेमके प्राधान्य कशाला द्यावे, या विचारात शिक्षक अडकले आहेत. 
__________________________________________________

स्थानिक निवडणुकांच्या तारखांमध्ये अचानक बदल झाल्यामुळे सीटीईटी परीक्षेला बसणाऱ्या शिक्षकांसमोर अडचण निर्माण झाली आहे. विशेष परिस्थितीचा सहानुभूतीपूर्वक विचार करून ७ व ८ फेब्रुवारी रोजी सीटीईटी परीक्षा देणाऱ्या शिक्षकांना निवडणूक कामातून मुक्त करावे. 

- महेंद्र गणपुले, माजी उपाध्यक्ष, माध्यमिक उच्च माध्यमिक मुख्याध्यापक संघ