संत गाडगेबाबा विद्यापीठ संलग्न ४९ महाविद्यालयांच्या प्रवेश प्रक्रियेवर बंदी 

एज्युवार्ता न्यूज नेटवर्क 

संत गाडगेबाबा अमरावती विद्यापीठाच्या (Sant Gadge Baba Amravati University) व्यवस्थापन परिषदेने नुकत्याच झालेल्या बैठकीत एक महत्त्वाचा निर्णय घेतला आहे. शैक्षणिक सत्र २०२५-२६ (Academic Session 2025-26) पासून शिक्षक व प्राचार्य नसतानाही सुरू असलेल्या ४९ महाविद्यालयांवर प्रथम वर्षाच्या प्रवेश प्रक्रियेवर बंदी (Ban on first-year admission process in 49 colleges) घालण्यात आली आहे. 

नुकत्याच संपन्न झालेल्या विद्यापीठ व्यवस्थापन परिषदेच्या सभेत सदस्य डॉ. आर. डी. सिकची यांनी विनाशिक्षक व विनाप्राचार्य असलेल्या ४९ महाविद्यालयांमध्ये शैक्षणिक सत्र २०२५-२६ पासून प्रथम वर्ष प्रवेशावर बंदी घालण्यासंदर्भात मुद्दा उपस्थित केला होता. त्या अनुषंगाने ४९ महाविद्यालयांमधील प्रथम वर्षाचे प्रवेश थांबविण्याचा निर्णय व्यवस्थापन परिषदेने घेतला आहे.

या यादीत ४९ महाविद्यालयांचा समावेश असून, विद्यापीठाने सर्व विद्यार्थी व पालकांना स्पष्ट सूचना दिली आहे की, या महाविद्यालयांमध्ये प्रवेश घेऊ नये. विद्यापीठाने स्पष्ट केले आहे की, या महाविद्यालयांमध्ये प्रथम वर्षासाठी प्रवेश घेणाऱ्या विद्यार्थ्यांची जबाबदारी विद्यापीठ घेणार नाही. त्यामुळे प्रवेश घेणारे विद्यार्थी व त्यांचे पालक स्वतः जबाबदार असतील. संत गाडगेबाबा अमरावती विद्यापीठाच्या अधिकृत संकेतस्थळावर ही यादी प्रसिद्ध करण्यात आली आहे. 

यामध्ये आर्यभट्ट इन्स्टिट्यूट ऑफ कॉम्प्युटर सायन्स, केशवनगर, उत्तमराव डहाके शिक्षण कॉलेज, कान्हेरी सरप, बार्शीटाकळी, वैदेही विष्णू सराफ कॉलेज, हर्ष संकुल, अकोला, गुलाम जैनुल आबेदीन कला कॉलेज, वाडेगाव, बाळापूर, मेधे इन्स्टिट्यूट ऑफ अॅडव्हान्स्ड स्टडीज, कौलखेड, हिंगणा, व्ही. के. जोशी कॉलेज, गायगाव, बाळापूर या कॉलेजमध्ये प्रवेश घेण्यास मनाई करण्यात आलेली आहे. येथे प्रवेश घेतल्यास विद्यार्थ्यांचे शैक्षणिक नुकसान होणार असल्याचेही संत गाडगेबाबा अमरावती विद्यापीठाने स्पष्ट केले.