SPPU पीएचडी प्रवेशासाठी विद्यार्थ्यांना आणखी एक संधी;संशोधन केंद्र निवडण्याची प्रक्रिया आजपासून सुरू 

एज्युवार्ता न्यूज नेटवर्क 

सावित्रीबाई फुले पुणे विद्यापीठाशी संलग्न असणाऱ्या विविध संशोधन केंद्रांमधील पीएचडी प्रवेशाच्या रिक्त जागांवरील प्रवेशासाठी आणखी एक प्रवेश फेरी राबवली जात आहे. येत्या 5 मार्च ते 20 मार्च या कालावधीत पेट परीक्षा उत्तीर्ण व पेट परीक्षेतून सूट मिळालेल्या पात्र विद्यार्थ्यांची पीएचडी प्रवेश प्रक्रियेसाठी मुलाखत घेतली जाणार आहे.

सावित्रीबाई फुले पुणे विद्यापीठाशी संलग्न पुणे,अहिल्यानगर व नाशिक जिल्ह्यातील विविध संशोधन केंद्रांमध्ये रिक्त असलेल्या PHD च्या जागांची माहिती विद्यापीठाच्या पीएचडी पोर्टलवर उपलब्ध करून देण्यात आली आहे. त्यामुळे प्रवेशासाठी पात्र असणारे विद्यार्थी पीएचडी प्रवेशाच्या पुढील फेरी करिता त्यांच्या लॉगिन मधून संशोधन केंद्र निवडू शकतात. विद्यार्थ्यांना 16 फेब्रुवारी ते 28 फेब्रुवारी दरम्यान संशोधन केंद्र निवडण्याची प्रक्रिया पूर्ण करावी लागणार आहे. ही प्रक्रिया पूर्ण करताना काही तांत्रिक अडचणी आल्यास विद्यार्थ्यांनी विद्यापीठाच्या आयटी सपोर्ट विभागाशी संपर्क साधावा. विद्यार्थ्यांना  020 -71 53 36 33 या संपर्क क्रमांकावर किंवा ईमेल  phdtracking_support@pun.unipune.ac.in या मेल आयडीवर संपर्क साधता येईल.

सावित्रीबाई फुले पुणे विद्यापीठातून पीएचडी प्रवेश करण्यासाठी अनेक विद्यार्थी इच्छुक असतात. विद्यापीठातर्फे या शैक्षणिक वर्षासाठी पीएचडी प्रवेशाच्या दोन फेऱ्या घेण्यात आल्या. मात्र तरीही अनेक विद्यार्थी पीएचडी प्रवेशापासून वंचित राहिले आहेत. या विद्यार्थ्यांना प्रवेशाची संधी उपलब्ध करून देण्यासाठी आणखी एक फेरी घेण्यात आली आहे. विद्यार्थी प्रवेशासाठी आपल्या जवळील संशोधन केंद्र निवडू शकतात, या संदर्भातील परिपत्रक विद्यापीठाच्या शैक्षणिक प्रवेश विभागाचे उपकुलसचिव डॉ.मुंजाजी रासवे यांनी प्रसिद्ध केले आहे.