धक्कादायक घटना! नाशिकच्या एमव्हीपी मेडिकल कॉलेजमधील लिफ्ट महिलेच्या अंगावर कोसळली

एज्युवार्ता न्यूज नेटवर्क 

नाशिक शहरातील आडगाव परिसरात असलेल्या मराठा विद्या प्रसारक समाजाच्या डॉ. वसंतराव पवार मेडिकल कॉलेज (Medical College) आणि रुग्णालयात आज दुपारी भीषण लिफ्ट अपघात (Elevator Accident) घडला. लिफ्टमध्ये वस्तू ठेवत असताना अचानक तांत्रिक बिघाड झाल्याने लिफ्ट कोसळली आणि त्यात एक महिला कर्मचारी गंभीर जखमी (Employee Seriously Injured) झाली. या अपघाताचा व्हिडिओ सोशल मीडियावर व्हायरल (Accident video goes viral) झाला असून, जखमी महिलेच्या मुलाची आर्त किंकाळी पाहून सर्वांनाच हादरले आहे.

घटनेच्या माहितीनुसार, एमव्हीपी मेडिकल कॉलेजमधील सफाई व अन्य कामे करणाऱ्या ज्योती अहिरे या महिला कर्मचाऱ्याच्या अंगावर लिफ्ट थेट कोसळली. त्या लिफ्टमध्ये वस्तू ठेवण्याचे काम करत असताना ही दुर्घटना घडली. लिफ्ट अचानक कोसळल्याने ज्योती अहिरे यांना गंभीर दुखापत झाली असून, त्यांच्यावर त्याच रुग्णालयात उपचार सुरू आहेत. त्यांची प्रकृती गंभीर असल्याचे सांगण्यात येत आहे. 

अपघाताची माहिती मिळताच ज्योती अहिरे यांचा मुलगा घटनास्थळी धावून आला. आईची अवस्था पाहून त्याने "माझ्या आईला मारून टाकलं रे..." अशा शब्दांत आक्रोश केला. या हृदयद्रावक दृश्याचा व्हिडिओ सोशल मीडियावर मोठ्या प्रमाणात शेअर होत आहे. लोकांनी लिफ्ट सुरक्षा उपकरणांच्या देखभालीकडे दुर्लक्ष केल्याची टीका केली आहे. आडगाव पोलीस ठाण्याचे पोलिसांनी घटनेची तत्काळ दखल घेतली असून, प्रकरणाचा तपास सुरू केला आहे. लिफ्टच्या देखभालीत काही कमतरता होती का, नियमित तपासणी झाली होती का, यासह विविध मुद्द्यांवर चौकशी सुरू आहे. 

दरम्यान, एमव्हीपी मेडिकल कॉलेज प्रशासनाने या घटनेवर अद्याप कोणतीही अधिकृत प्रतिक्रिया दिलेली नाही. ही घटना नाशिकमध्ये लिफ्ट सुरक्षा व्यवस्थेवर प्रश्नचिन्ह उभे करते. काही दिवसांपूर्वी जेलरोड भागातही लिफ्ट अपघात घडला होता. अशा प्रकारच्या दुर्घटना वारंवार घडत असल्याने रुग्णालये आणि शैक्षणिक संस्थांमधील लिफ्ट्सच्या देखभालीसाठी कडक नियमांची अंमलबजावणी करण्याची मागणी पालक आणि नागरिकांकडून होत आहे.